सिख्रि सिख्ला: आमटेका दैसानि उदांस्रि Poem by Ronjoy Brahma

4. आमटेका दैसानि उदांस्रि
बेसेबा गिदिर अरन बारलांनानै सानसेखालि बांबुला आरो आवबाजोँ आमटेका दैसायाव ना बोन्नो थांनायसै।
सिगां दिरुंआव ओँखाम फिथर खानानै दैयाव सोमब्र हरनायसै आवबाया।
लोगो लोगो उखैहाबनाय दैसानि खांख्राय असुरा जोबोद लुबैनानै गोरगोर खारबोनायसै।
बियो खेबसेनो ओँखाम फिथरखौ स्लिम जाजोब गारनायसै।
आवबाया आरोबाव ओँखाम फिथर खानानै सोमब्र हरगारासै।
आरोबाव खांख्राय असुरा ग्लब मननायसै खुसियैनो।
आवबाया रागा जोँगारासै गले गले खांख्रायजोँ मन'जानायाव।
बियो दानिया अन्थाइखौनो खर'आव खावखानाय फालियाव खाथुमनानै दैसायाव सोमब्र हरनायसै।
जाम्बा खांख्राय असुरा होनबा बेखौनो नारानाथा मननो नाजानायसै।
बे समावनो आवबाया दान्दा देमलायनाय बोरियाव बोखोनायसै बिखौ।
आरो खांख्राय असुरा होनबा आवबाखौ नुनानै मिनिगारबाय।
बियो आवबाखौ नुनानै जानो होसोनायसै मिनिखुसियैनो।
''आंखौ होसोबायलै आदा बांबुला!
खांख्राय असुरा आंखौ होसोबाय'' होन्नानै खारबाय आवबाया।
खांख्राया आवबाखौ मोनहां मोनहां होसोबाय,
आरो बांबुलाया खांख्रायखौ होसोलांबाय।
उनाव आवबाया बिफांआव गाखोना थानायसै,
आरो बांबुलाजोँ खांख्रायजोँ सानसे बुलायनायसै।
सिख्रि सिख्लाया दैसानि समायना रमायना मेथ'खा बिबार बारियाव गान्दौला जानानै नायहरासै।
खांख्राया मेंब्ला बोलोगोरा बांबुला जोहोलावआ खांख्रायनि फारनै दाबुखौनो बोखा गारनायसै।
उनाव खांख्रायखौ अन्थाइजोँ देग्लिनायसै बांबुलाया।
आरो खांख्रायनि मोदोमा दुमावलु हाद्रिनि दामोल जानायसै।
होनबासो आमटेका दैसानि उन्दै उन्दै नाफोरा रंजानायसै।
बयबो उदां मोनबाय होन्नानै मेथाइ खन्नायसै।
मोनाबिलि समाव बिसोर खांख्रायनि दाबुखौ फारफा फारफा बान्नानै लाबोनायसै।