सिख्रि सिख्ला: गल' दाहोनानि जिउ मोनफिन्नाय Poem by Ronjoy Brahma

गल' दाहोनानि गोथै सह'खौ
लावथि बारियाव सावनो लांनाय जादोँमोन,
बांबुला जोहोलावा सावनो होआखिसै
बियो गावनि उसुं सेरावनो फबनायसै।
सालगुरि गामिनि बयबो
बांबुला जोहोलावखौ सैया जाबाय,
बांबुला जोहोलावखौ मुगैनो हमबाय
जखायसै दान जखायनै सान थांनायसै।
सानसेखालि हराव बियो सिमां नुबाय
बियो ओरैबादि सिमां नुदोँदि,
गल'नि फारसे खोमाखौ उरि अरफ्लंबाय
फारसे आथिँनि आदैयाव एम्फौ अरनायसै।
गल'नि गोथै हाखरखौ लासै लासै
अरननि सियालफ्रा बुरनो हमबाय,
हाम्फे रुवाथिखौ सैथाना लांनो फैयो
गामिनियाव मेगन मोदैनि हर जाबाय।
गामिनि बयबो हाम्फे रुवाथिखौ
बेखायनो होखार हरनो सानबाय,
हाम्फेनि दुखुआ बेसेबा बांबाय
थैनो आंग्रिबाय थानायसै बियो।
सानसेखालि हराव बांबुला जोहोलावा
हाम्फे उन्दुग्रा नआव जमनायसै,
गोबौ सिखा गोलाव लानानै
बांबुला जोहोलावा नेबाय थानायसै।
नै हाम्फे दंना गैया नआवला?
ओँखारदो सानैजोँ जुलि जानोसै,
आं दिनै नोँखौ लांनो फैबाय
नोँदि समाय लादोँमोन आगै।
सैथाना दर्जा सेराव बुंफैनायसै
होनबा बांबुला जोहोलावा बिखौ,
थाब्रुम गोरायै हमथाना लानायसै
सैथाना एमब्रानो आरो हालिया।
दानिया बहा गबावनो नोँलाइ?
बुं गल'नि जिउखौ बहा दोनदोँ,
गोख्रै बुंदो नङाब्ला नोँनि मोदोमखौ
अराव आहुति होनोसै दानफ्लेनानै।
होनबासो सैथाना गल'नि जिउखौ
खुगानिफ्राय बरन्ना हरफिन्नायसै,
लोगो लोगो सैथानखौ बांबुला जोहोलावा
थबस्र दानसना होनायसै।
दाउखा जानानै सैथाना होनबा
बिरलांनायसै सोर्गोआव गोख्रैनो,
गल'आ हाखरनिफ्राय सिखारना फैफिन्नायसै
बयबो सोमो नांनायसै।
बिनि खोमाया फारसे गिजि जाबाय
आथिँआ फारसे लेँग्रा जाबाय,
बे समनिफ्रायनो हाम्फेया उदां जानायसै
गल'जोँ मोजां मोनलायफिन्नायसै बियो।
बयबो होनबासो बांबुला जोहोलावखौ
जोबोद खुसिजोँ बाख्नायगारासै,
सालगुरि गामियाव सैथाननि सहखौ
अराव आहुति होनायसै।