सिख्रि सिख्ला: उदांस्रि गोमानाय सिमां Poem by Ronjoy Brahma

हराव सानाव बांबुला जोहोलावा उन्दुलांब्ला
दाउ जानानै खाथियाव थाफैयो,
बेरे सिखिरि जानानै बियो
बिरबायो बांबुलानि सेर सेर।
गोदो गोदो उन्दुलांब्ला नायगोमोयो
बांबुला जोहोलावा मोदोम सानेरब्ला,
बाग्दावखाङो सिख्रि सिख्लाया
जेराव बांबुला बेयावनो सिख्रि सिख्ला।
हामा-दैमा अरन गेजेर गेजेर
उरां मारिमारि जोमै दाउसिन जानानै,
बेरेमा सिखिरि जानानै
बांबुलाखौ संदानो अराय बियो।
बांबुला जोहोलावनि मेथाइ खोनासंङो
बिनि खुसियाव बार जाना बोहैयो,
लामा-सामायाव साया जायो
बिबार जानानै मिनिस्लुयो।
सानसेखालि रिउ रिउ सुफिन दामनायसै
बांबुला जोहोलावा लावखार बिफांआव,
मासे बाथ'थिया जानानै बाफैनायसै
दालाइयाव मोसाग्लांनायसै सिख्रि सिख्लाया।
जोबोद गोमो हाबनायसै बांबुलाया
बिनि मोसानायखौ नुनानै,
सुफिनखौ आरो रिँहो बावनायसै
मोसाग्लांनायसै बाथ'थियाआ।
नै बाथ' थिया आय' हाबाब
नोङो एसे मोजां मोसानो रोँगौ,
आय' नोँखौ सोर फोरोँखो बेबादि?
नायबाय थाथाव हाबाब।
होनबासो दाउसिना बुंनायसै-
जोहोलाव नोँनि देँखोआ ओरैबादि रैसुमैदि,
बे देँखोआनो आंखौ फोरोँनायसै
आरोबाव दामदो सुफिनखौ।
हनै बिफां-लाइफांआ खुसि जादोँ
जिब-जुनारा सिरि मोनदोँ,
जोहोलाव मुलुगा रंजाखांगोन
गिनाय मेँनाय गोमालांगोन।
आरो बांबुला जोहोलावा बुंनायसै-
दाउसिन आंजोँ थांफादो नआवनो,
हरफ्रोम दानसोरां हराव आं सुफिन दामो
हागोन नोँ आंनि सेराव मोसानो।
बे समनिफ्रायनो बांबुला जोहोलावा
दाउसिनखौ नआव लानानै फैबाय,
जोबोद अन्नायजोँ बियो सानसेखालि
अनजालि गयस्रिनो फिनो हरबाय।
सिख्रि सिख्लाया मासे थिया जानायसै
गयस्रिया बिखौ फानजारियाव सोआसै,
आरोबाव बाथ'आ महर सोलायनो हालिया
बियो सिख्रि सिख्ला जानो हालिया।
गयस्रिनि इसानसालियाव बियो गाबो
गयस्रिनि गोमो गोथां आगरखौ नायनानै,
बांबुला जोहोलावा सुफिन दामो
मोसानो बोदोर जायो बियो।