सिख्रि सिख्ला: हाम्फेया सैथानखौ गियो Poem by Ronjoy Brahma

सैथाना हादान माहाजोन्नाव दाहोना थाफैनाय समनिफ्राय
हाम्फेया बिखौसो गोसोथोबाय,
दानिया बियो गल' दाहोनाखौ
सैया सैया खालामनो हमनायसै।
दैसा गाथोन मोसौ गुमग्रा फोथार
बिफां साया साया सैथानजोँ रायज्लायो,
जानायाव लोँनायाव आरो मावनाय-दांनायाव
सानैजोँ बिसोर मिनिस्लु मिनिलायो।
हाम्फेया आरो सैथानजोँ थैस-थांसनि
संसार जागोन होन्ना खोथा होबाय,
सैथानखौ मोनाब्ला थैगोन होन्नानै
गोसो गोरबोजोँ समाय लाबाय।
सैथाना जोबोद मावथि जानो हमबाय
जिग' जिग' गोबां खामानि मावनायखौ नुनानै,
हादान माहाजोनाबो सैथानखौसो अनसिनबाय
बियो हाम्फेनि सिबिजाथाव जानायसै।
सैथानादि एसेबां ओँखाम जायो
बेखौ बयबो सोमो नाङो,
हाम्फेया नाथाय बेनो मोजां मोन्नानै
ना बेदरखौ बांसिन होखोमायो।
गल'आ सैथानखौ गोबां खामानि मावहोयो
गावहा गोजोनै जिरायनो हमबाय,
सैथाना जोबोद दुखु खालामबाय थायो
गावनि गोमोरनो हानाय जिरादखौ बिनानै।
गोमोरनो हानाय जिरादा गैलिया सैथानहा
गल'आ बेखौ सेखना लाबाय,
नार्जी थफ्लायाव सैनानै दोनबाय बियो
सैथाना हाननो हाया जाबाय।
सानसेखालि नार्जि ओंख्रि जानो नागिरनावनो
हाम्फे रुवाथिया मोनसनबाय,
जेबो मिथिरोङैलाय बियो सैथाननो दिन्थिनायसै
सैथाना लानानै स्रोब गोमोरलांनायसै।
हराव गल' दाहोनाखौ सैथाना
गोदोना सेरथेनानै बुथारफैनायसै,
बे समनिफ्रायनो सैथानखौ गिबाय हाम्फेया
मानसि नङामोन होन्ना मिथिनायसै।
दानिया खेबफ्रोम हर हरावनो
सैथाना हाम्फेखौ लांनो फैयो,
दानिया हाम्फेया हार्सिँ बेराया उन्दुआबो
गासै हरावनो हाम्फेया उन्दुनो गियो।