सिख्रि सिख्ला: अजगरनि राजा जानो लुबैनाय Poem by Ronjoy Brahma

स्नि थोरफो जोमै बारलांब्लाबो
दाउखाया सोर्गोआव थांनो मोनाखिसै,
सोर्गोनि आरफ'फ्रा बिखौ
रायखसनि हादराव होहरफिन्नायसै।
होनबा गाबै गाबै रायखसफोरनो दाउखाया
बांबुला जोहोलावनि गोहो आरो सोलोखौ फोरमायनायसै,
बांबुला जोहोलावनि सल' खोनानानै
रायकसफोरनि बिखाया मावखांनो हमनायसै।
बिसोर जेरैबो बांबुला जोसेलनिफ्राय
बारगनो सांग्रां जानो हमबाय।
ब्रै जखाय साननि उनाव सानसेखालि
लावख्रि बारियाव बांबुला जोहोलावा,
हार्सिँङै सिखार खालामनो थांनायसै
बियो अरन गौथौआव सहैनायसै।
गोजौ गिदिर गुफुं मदद जांगिला
बांबुला जोहोलावनि सोलेरखौ नुनानै,
होनबा मासे रायखसा
दैस्लुं जालायनाय खुदै गनायसै।
जेरैबाबो बांबुला जोहोलावखौ जानो सान्नानै
रायखसा मासे मोसानि महर लानायसै,
जोबोद गोख्रैयै बियो बारसिन्नो होसोआसै
आरो बांबुलानि बोर्ला जिलिदखौ सेख'ग्रोनायसै।
होनबासो बांबुला जोहोलावा बिखौ
अन्थाइजोँ खुबैनानै जसो होनायसै,
आरोबाव मोसाया बिखौ होसोबायासै
बांबुला जोहोलावा बारबादि गोख्रै खारनायसै।
फांसे बिफांआव गाखोनायसै बांबुला जोहोलावा
होनबा मोसाया खुदै गनानै,
बिफां सेरावनो दैस्लुं खालामनायसै
जाम्बा मोसाया नायदावबाय थानायसै नेनानै।
साना हाबहां जाब्लासो मोसाया
मासे अजगरनि महर लानानै बिफांआव मानखोनायसै,
होनबा बांबुला जोहोलावा गोमो हाबासै
अजगरा मानखोथारनायसै बिफांआव।
मिनिस्लु मिनिनानै बियो बुंनायसै-
गोथाव मोदोमफ्रु मोदोमसो गारदोँ आय' हाबाब,
नै जोहोलाव दिनै नोँखौ मननाय जासिगोन
नोङो आंनि उदैयाव बाब्राब बाब्राब आवलिसिगोन।
होनबासो बांबुला जोहोलावा बुंनायसै-
नै जाम्बा अजगर आंनि मोदोमा ओरैबादि गोरादि,
जखायसे साना हाबलाय ओँखारलाय जाब्लाबो
नोङो आवलि होनो हानाय नङा।
आरो नोँ आंखौ मनयोब्ला मिथिगौना
आं नोँनि उदैखौ बिसिगोनखि बिसिथारगोन,
नै अजगर नोँखौ जोबोद समायना नुदोँ
अनथाव बाथाव थांदो जिबौ जानानैनो थाहैदो।
नोङो अजगरनि राजा जानानै
आलो आलो गोजोनै मोनजागोन,
होनबासो अजगरा राजा जानो जोबोद लुबैनायसै
बियो बांबुला जोहोलावखौ खुलुमगारासै।
बिफांनिफ्राय ओँखारना थांफिन्नायसै बियो
बे साननिफ्रायनो-
रायखसा अजगर जानानै थानायसै
जेरैबो गिदिँ बायनायसै बियो।
रायखसनि हादराव थांफिना लासेनो
अजगरनि राजा जानो लुबैनानै,
अजगरनि हादर नागिरबायनायसै।