सिख्रि सिख्ला: अजगरा अजगरखौ सिनायो Poem by Ronjoy Brahma

अजगरनि राजा जानो लुबैनानै
मानबायै मानबायै सानसेखालि,
गोमो बिलोआव सहैनायसै अजगरा
खुसि जानायसै गावनि महरखौ दैयाव नुनानै।
आरो जोबोद रंजाखांनायसै बियो
अजगरनि हादर नागिरनानै मासे नेवलाइखौ,
लामायाव लोगो मोन्नायसै हार्सिँङै
देलाइया गिनो हमनायसै बिखौ।
नेवलाइया बेखौ नुनानै बुंनायसै-
खबरदारलै बाहाय खाथियाव दाफै,
मिथिखा नङाबा दावहाया जागोन
थांदो लासैनो गोजानै गोजोन।
उदै बुंनाय नङा सान्नानै अब्ला
रायखस अजगरा बुंनायसै-
नङालै बाहाय नोँजोँ आंहा सुथुर नङा
अजगरनि हादर नागिरनानै मेंख्लाब फैथारबाय आं।
होनबासो नेवलाइया अजगरनि रायजोखौ खिन्थाहरासै
अरन मोनसे बारलांनानै बियो,
अजगरनि हादराव सफैबाय दानिया
अब्ला गोबां अजगरा बेखौ बेँफबनायसै।
रायखस अजगरा दुगायै बुंनो हमबाय-
ओइ बाहायफोर नोँसोर आंखौ सिनायाखै नामा?
आं अजगरनि राजालै मिथिबायना?
दिनैनिफ्राय आं नोँसोरनि राजा जाबाय।
बाहायफोर आं एबार आलो गोजोन मोनजासिगोन
होनबा अजगरनि राजा रानि गासैबो ओँखारबोनायसै,
अजगर हादरनि राजाया बिखौ बुंनायसै-
ओइ बाहाय आंनो अजगरनि राजालै
आंनो अजगर हादरनि राजा मिथिबायना?
नोँथांनिबादि हाथाइ एसेबां गोलाव
जोँनि बंसआव गैयालै मिथिबायना?
नोँथांआ अजगर जानो हाथारा
आरो राजा जानो हानाया गोब्राबलै।
होनबासो रायखस अजगरा जोबोद लाजिगारासै
जोबोद रागा जोँनानै बियो,
अजगरनि फिसाफोरखौ अरथारनो होसोनायसै
बयबो खारस्राव जोबनो हमबाय।
नाथाय हादरनि अजगरा खैसे जानानै
उनाव बिखौ होसो हरनायसै,
रायखस अजगरा खिबुआव खि लानानै
अरन फारसे गाव फैनाय लामाजोँ खारलांफिन्नायसै।