सिख्रि सिख्ला: रायखस अजगर आरो मोसौ गाय Poem by Ronjoy Brahma

अजगर हादरनिफ्राय होहर जानानै
रायखस अजगरा सानसेखालि उखैहाबनायसै,
लामायाव जेबो जानो मोनैलाय
बियो सम सम मेँनायजोँ सलादेँ उन्दुनायसै।
अरननि मोसौ मैफ्रा बिखौ
उन्दुलांफुनाय समाव जाम्बा अजगर होन्नानै,
नायगार नायगार गाख्लाब लांदोँमोन
सोरबा सोरबा गाग्लि लांदोँमोन।
आरो मासे एनजराबो बिनि लानजाइखौ
थबस्र अरसनानै फिसाफोरनो दिन्थि हैदोँमोन,
बियो जोबोद दुखु खालामदोँमोन
दिनै मोनसे फोथाराव ओँखारफैनानै गोसोखौ स्रां मोनदोँ।
लोगो लोगो फोथाराव मोसौ फिसाखौ
बिमानि आबु जाबाय थानाय नुनायसै,
होनबासो बियो खुसिजोँ
मोसौ फिसाखौ मननो होसोलांनायसै।
मोसौ गाइया उनथिँ बिखौ
खुगायाव थाब जोनानै होनायसै,
आरो बिनि हाथाइया थेम बायजोबगारासै
जोबोद बाब्राबसो गारासै बियो।
रायखस अजगरा बुंनायसै-
आंनि हाथाइखौ नोँदि जोफायना होबाय,
सि जोबोद दुखु नांथाव जाथारबाय
थैनायखौ गिनायनिफ्राय सहायनो हायैसिन जाबाय।
आं दानिया उखैयै उखैयै थैनांसिगोन हाबाब
होनबा मोसौ गाया बुंनायसै-
ओइ बाहाय नोँनि हाथाइयानो नोँनि सुथुरमोनलै
नोङो दानिया जाम्बा मोदायखौ हांख्रायदो।
बाहाय नोङो ओरैबादि बुंदि-
आं मानसि जानो,
आं मानसि जानो लुबैदोँ
ओइ बाहाय बेबादिनो बुंबाय था।
बे साननिफ्रायनो रायखस अजगरा
फांसे सिमलि बिफांआव फानफ्रेनानै,
गोबां सानहर आरज गाबनायसै
बियो जाया लोङा गोबां थानायसै।
जखायनै दान मोनथाम बियो
आं मानसि जानो होन्नानै,
गलेगले बुंबाय थानो हमासै
सान हरा गोबां थांनायसै।
मानसि बेदर जानो लुबैनानै आरज गाबनाया
सानसेखालि नाथाय बियो,
मानसिनि महरसो जानायसै
मानसि रुबैनो थायासै बियो।