सिमां नङा सिमां सिमां Poem by Ronjoy Brahma

बाहाय नोँ बुंनायानो थिख
मानोना जोँ जोबोद जाम्बाथारमोन
नारेँजुमब्रानि जोलुर जोनायाव खेबसे
बैग्रि फिथाइनि मार्बल गेलेनायाव खेबसे
नारानाथा जोँ गोदोना सेरथेलायदोँमोन।
दा गोसो खाङाब्लानो थानो हाया
थाम (सुमफ्राम) नि बोथोर फैयोब्ला
थाम खावनायनि गोजाम बिदिन्था
थालिर फिथाइ बिफां नुयोब्ला
थालिर खावनाय जोफायनायनि सावगारि।
नंगौ बेफोरनो जिउनि सल'
दागोसोखांसै फंबाय दागोसोखांसै होन्नानै
गावबो गोसोखाङाब्ला थानो हाया आं
सिमां नङा सिमां सिमां मोनो आं।
बेखायनो जिउखौ बाहागो रानबाय आं
दैज्लांनोबो फेरलेबसे होनाय जाबाय
मेसेँनोबो फेरलेबसे होनाय जाबाय
गोजां बोथोर गोलोम बोथोरनोबो होबाय।
बिसोर बिफैयो आंनि जिउखौ
अर आरो सान्दुंनि सेराव
बिसोर बिफैयो गाबनाय मिनिनायाव
आं बिसोरनोबो रान्नानै होयो।
दा आंहा जिउ गैलिया बेखायनो
बिसोरजोँनो थांनानै थायो आं
आंखौ लाफा आंखौ लाफा होन्नानै
बिसोरबो आंखौ गोबानानै लायो।
नोँनि अननाय फाखनजोँ गोथौसिनाव
बसुमतारी नोँ आंखौ गोबाना लादो
बार अख्रां मोकथां आरो सिमां
नोँसोर आंखौ दानागार दानागारथार!