नोँनि अननायखौ आंनो बिलाइहर Poem by Ronjoy Brahma

हाजोनिफ्राय बोहैबोनाय गोगो दैसायाव गसंनानै
हाजोखौ गोजोनै नायहरदोँ आं,
बेसे समायना आय' गोसोआव सान्नानै
आंनि मेगनाव बिबार फाइलि गेवलांनाय।
सोमखोर बिफांनि दालाइयाव दाउसिन
बे समाव आंनि गुरै गोरबोआव
गोसो थोनायनि खन्थाइ सोमजियो,
फाइलि गेवलाङो बिबारनि मेथाइयाव।
मिथिँगानि बिखायाव सन्दे सुफिन सुयो
हाजो नोँ जेसेबां हायो आज्लं,
आंखौ नायहरनानै हायेन फारसे
नोँनि अननाय गोरबोखौ फोरमायनो।
दैसा बोहैहो अराय आंनि फारसे
हाजो दिनै नोँनि गोसोम खर'आव
फुरसब गुरै गुरै जोमै गोबादोँ
बिसोर नोँखौ खुदुमदोँ आरो बिलिरदोँ।
आंनि गोरबोआबो बेबादिनो हास्थायो
हाजो नोँनि बिखायाव एखमबा बर'फ,
अराय सोरां रोदानि बिलिरनाय
नोँनि सेराव जायख्लंनि बिदिन्था।
दिनै बेसे समायना सरतनि मिथिँगा
नोँनि बिखायाव दाउसिन-दाउलानि गोबानाय,
नोँनि बिखायाव जिब-जुनारनि उफ्लेनाय
हाजो नोँ अनसुला, नोँ अनसुलिबो।
नोँनि अननायखौ आंनो बिलाइहर
आंनि फारसे गोगो दैसा बोहैहोनानै।