खन्थाइ नङा खन्थाइ/ओरैनो बुंनाय नङा Poem by Ronjoy Brahma

आं नोँखौ गोसोथोयो
मोनसे दाय गोनां बाथ्रा बेयो
बे फंसे बाथ्रानि थाखायनो
सेंग्रा-सिख्लाफ्रा फाग्ला-फाग्लि जायो
बुंनो हायैयाव बिखा गावनानै थैयो
माब्लाबा थामज्रेँ सोबा जायो बुंफ्लांना लानायाव
जानला मोनला बुंनो हामानो
महर नायै आखल नायैसो बुंनाय जायो
बैसो नायै बाख्रि नायैसो बुंनाय जायो
मोनसे दाय गोनां बाथ्रा बेयो
मेगनजोँ मेगन लामा सामा जेरावबो
सौग्राव सौग्राव गोबां नुनायनि उनावसो
अनजालि आंबो बाथ्राखौ बुंफ्लांदोँमोन
आं नोँखौ गोसोथोयो होन्नानै
थब नोँबो बेबादिनो बुंदोँमोन गियालना
नाथाय बेयो ओरैनो बुंनाय नङा
नोँ दिनैनिफ्राय गाबनो सोलोँनांसिगोन
गलेगले लोगो हमनो सोलोँनांसिगोन
मानोना ओरैनो बुंनाय नङालै बेयो
गोथौसिन लैथोमाखौ आवग्रिबाय नोङो
खायमा अख्रांखौ आवग्रिबाय नोङो
आवग्रिबाय साहारा बालाहामाखौबो
आवग्रिबाय सान्दुं अखायाव थैनायखौबो