हब्रा हब्रा गाबनो लुबैदोँ आं Poem by Ronjoy Brahma

जोबोद गोबाव जाबाय हब्रा हब्रा गाबनो मोनैया
नंगौ आंनिनो गोरोन्थि जादोँ
गाबनायखौ आं रुटिन खालामना लायाखै
माब्ला गाबनो? बबे समाव सम खाना दोनाखै
आं माबोरै गाबनो हागोन
सानो आं खेबसे खाफाल खुथरनो
नाथाय सागोन सागोन जोबोद गियो आं
सानायबो दं जोँनि गासै मोदोमाव
हब्रा हब्रा गाबनो लुबैदोँ आं
नाथाय मेगननि मोदैखौबो आद्रि खालामनो हाया
दुब्रिया ज्रिँ रानलांगोन मिथिगौ
आं गोसोखाङो आफाजोँ फैजानायखौ
औ आं गाबदोँ, आं जोबोद गाबदोँमोन
हनै बुहुतआ उसुं खनायाव आयौ-
साखन्द्रा साखन्द्रा बाबुखौ लांफै
गिनो रोङै बायगर जाथारबाय बियो
आइया थगायदोँमोन आं गाबदोँमोन
बेफोर गाबनायाव बिबार बारोमोन
अख्रांनि जोमैयाव अखाफोरा गेलेयोमोन
आरो बैफोरबो दिनै सोगाबनो हालिया
गाबनायखौ आं रुटिन खालामना लायाखै
मुगाफ्रोम उन्दुयो बाय जाबथु मिनियो
गेलेयो खारो रायज्लायो आरो
आं मन्दिराव रायजोफोरजोँ नायदेरलायो
अनजालिखौ खेबफ्रोम फुं बेलासि लोगो हमो
अब्लाबो आं गाबनायखौ रुटिन खालामना लायाखै
हब्रा हब्रा गाबनो लुबैदोँ आं
मोनसे लैथोनि उनाव लैथोमा बारलांनानै
मोनसे अख्रांनि उनाव अख्रां बारलांनानै
जिउनि जोबथा मारुआव गसंना
औ औ खबाम गुब्रुनाय मेथाइबादि