बै समखौ आं लेँहरो Poem by Ronjoy Brahma

सोर्गोनि गुफुर जोमैयाव गाखोनानै
आं नागिरो गोरान बुहुम
ज्रुम ज्रुम बारज्रुमनो अखा जानानै
गोदान बुहुम सोरजिनो मिजिँजोँ
मोनबाय मोनथारबाय आं गोबां मुलुग
जेराव आंनि बिखाया थोआ
बिसोरनि गोरान बिखाखौ गोबानो
थाजिम खालामनो अराय सान्नानै
बेखायनो आं सैनायखौ लेँहरो
फैफै बारदैसिख्ला जानानै बुङै बुङै
नाथाय देलाइमांग्रि रजेया बुङो र'र'
बिलोगो बैसागिखौनो बिबो लामा नायो
गोथां-लाइगां दखना, सोमखोर मोखांजोँ
जेन'बा बिसोर आलासि जानोसो फैगोन
जोँ बरायनो गोनां जागोन खाम बुखो बुखो
आरो सिफुं सुगदाव सेर्जा हुगदाव
जथा खावांजोँ जाबख्रिँ खुरैजोँ
दाउखा नुयै फुंआव दुगैना, गोदान गोरबो लानानै
गामि गिदिँ गिदिँ मेथाइ रोजाब रोजाब
हायला-हुइला समायना समायना मोसानानै
होनबा बै समखौनो आं लेँहरो
नोँनि आंनि दोँसे गोदै मेथाइयाव
मुलुगनि गोदान जांख्रिखांनाय
नोँ आंनो मिनिनाय हो, आं होगोन गोजोन्नाय
आय' आंखौ दाबाव, आंखौ दानागार