सोर सिफायखो नोँनि गोसो, आलाइस्रि? Poem by Ronjoy Brahma

आलाइस्रि, नोँ बलायनाय मेगननि मोदैया सोरनि
सोर सिफायखो नोँनि गोसो?
दोँसे खन्थाइ?
जिरोन गैयै हरनि सानस्रि?
मोनसे फिन्नाय गैयै लाइजाम?
गुरै गारांजोँ दाउसिनफ्रा रोजाबो
नोँनि मेगननि मोदैखौ नुनानै
आरो आं सुयो बैदासि सिफुंआव
नोँनि मोदै गसरनाय दाहानि तालजोँ
थामथि मुलुगनि सुबुंफोरा
दा फोथायलिया दाउखानि गाबनाय
आरो फोथायलिया फेसानि खैफोद दिन्थिनाय
खैफोदा फैयो खौऔनि गारांआवबो
जांख्रिखांनायनि बुथारनाय, जुवानि दावहा
उफ्रा बिसारनि बुथारनायफोर
आलाइस्रि, नोँहा माबा बुंनांगौ दं नामा?
समाजखौ, हारि आरो हादोदनि-?
नाथाय नैबे गंसे खुरै
नोँ जेब्लाबो मोदै फसर फसर
आंनो फियाला होनबा थगायबाय
दा आंहा दुखुनि खौरां
सासे माया हमजानाय आफादगिरि
हाग्रा बिबारनि लह्रायनाय आंनि खन्थाइयाव
आरो आं नेनानै थायो गासै मोदै
नोँजोँनो लोगोसे गोरोबफानो