बर'फ गेजेराव Poem by Ronjoy Brahma

नोँनि अननाय होनाया
दमाद खानानै आंनि बिखायाव,
गोजां बोथोरखौ बोनानै लाबोबाय
जेब्लाबो गोजां जायो बर'फ गेजेराव।
हालाय-हाफाय नोँखौ नागिरनायाव
थेवबो नोँ बहा खारखोमायो?
गां फुवारना रजे बहा बिरलाङो?
नोँखौ नागिरो आं स्लेज गाड़िजोँ।
साननि गुरै मोखांनि मिनिनायजोँ
लाथा खानाय बर'फ गलिनायाव,
दान्दिसे नायगोमोनाय हाथासि मेगनाव
नोँखौ नुबाय नुबाय मोनो अब्ला।
बहा थायो अनजालि नोङो?
इस्किम'नि नसा इग्लु सिङाव?
ना आमोल-दिमोल गेलेना थायो-
लैथोमानि सिख्रि सिख्लाफोरजोँ?
थेवबो आं नागिरो सिलनि बिखुंआव गाखोनानै
जेरैबाबो नोँनि आन्दोआव थानो हाया,
हानजायै अख्रांआव मेथाइ खोनासंनाय
एबा फेँगुननि आफादसालियाव।
आं नोँखौ नागिरो गले गले
अंटार्कटिकानि बर'फ गुन्द्राजोँ बिरफानायबादि
रजे साया-माया नोँखौ नुयो,
नाथाय नोँ गैया आंनि आखायाव;
अब्ला नोँ खारखोमा लांबाय नामा बालाहामायाव? ?