मोनसे गुस्लायनाय Poem by Ronjoy Brahma

गांगाथफा बिखायाव गोबानाय
बुरलुंबुथुरा न'-बां फोजावनायबादि
बर'नि जेबो गोमालांदोँ
सोदोमस्रि गोबानाय सोनाबनि बाजोनाजोँ
.
सोरजिया बर' समाजनि
गोदानै सनानि देरा गायसन्नो थांनायाव
जोँनि जेबा-जानजिनि हिया गुलांदोँ
बिसोर मिनिदोँ लंथंसो बिसोर लंथंसो होन्नानै
.
दल दामै दामै
जेरैबो बारा दरजा नारफैदोँ
बायनानै ला बायनानै बुंनानै
सिफि खंख्ला सोलेरबादि गोरबोआ
.
जोँ मिथिगौ
नांगोल फालजोँ जारिमिन सुजुनाय
जोँनि गोलाव जारिमिना
एनजर गुदुंनि सिङाव थुम थुम
.
जेखाया जाखय जालांनायबादि
नांगोला नाङल जालांबाय
बेखायनो जोँ सिनायनो गोब्राब
नोँबा सोर आंबा सोर?
.
थेवबो फोरमाननि थाखाय
जासुला फारियानि रावजोँनो बुंदिनि-
जेला सेला जातिखौ सिनायनो हायाब्ला,
खावलाइयाव थाव सोबा जातिखौ थं ला।