बेलागुर सावना रंजागोन Poem by Ronjoy Brahma

हाथाइ रिजि ददेरे मिनिसुलु
फैबाय लाजिबांसिन लाजिगुसु
पुषनि बरप निहिर गुन्द्राखौ
नारानाथा उरसि उरसि सौसिनानै
बेलागुर सावना रंजागोन
थुम-थाम औवा बेरनायजोँ
बाज्ल बाज्ल रंजागोन जोँ
खौखाब मावलायनाय गोजांनायखौ होखारगोन
फैबाय सफैथारबाय दमासि
जाम्फै दारियाजोँ दै लाबोनायबादि दुब्लियाव
नोँखौ बरायना लाबोगोन दुलाराइ गामियाव
हिनजाव गोदानखौ नमा नआव थिसनफैनायबादि
नोँखौ थिसनगोन जोँ बयनिबो गोरबोआव
दैसायाव थुखैनो लांगोन मोसौ फालो
लाव जा फान्थाव जा मेथाइ खनगोन
फोथा होगोन खाफालाव
दाउखा नुयै फुंआवनो दुगैगोन
लावखार ओँखाम जागोन दैसा सेराव
गोदोनायाव लागोन आर'नाइ फालि
एन्थाब सौराय फिथा जागोन
खाम-जथा दामना मागिगोन
गामि गिदिँना मोसागोन गथ'-गथाय
मेथाइ रोजाबगोन खुगाजोँ बाग्लायबोनाय
बेबादिनो हगारहरगोन स्राय खुसियै