हा हा बैसागु Poem by Ronjoy Brahma

दा लांफैगामिनि हाजि हाजि बुरैफोरा
मायब्रानि जुमायाव एमाव फुनबाय जानांगौ,
ओरैनो सन्देह खालामाखै आं!
सानफ्रोमबो सोफै सोफै दाउ खौऔआनो।
बेगेँ नुजानाय मोसौ बोरायाबो
गांसो गोरलै जानानै गुफुं जाबाय,
सिमलि थुलाया जेरैबो उरायलांबाय
ओरैनो नङा- जोलै सुखांनो।
अनजालि आंनि आगर सिनायनो रोङै
बावखुंग्रि हाजो गाखोनो जोबोद उसुखुथु बियो,
आं गोदो गोदो उन्दुलांदोँमोन
बियो आंखौ फोजाहरो सोरांस्लाबमोनै!
खौरांआ आरो माथो जावनो लोगो?
सोँहरो गावदां आंनि अनजालिया,
जायखौ आं मावजि होन्नानै बुङो-
देग्लाय बावखुंग्रि हाजोआव गाखोहैनो थांगोन ना थाङा?
फै फै नोँ बैसागु बारदैनि गांखंआव गोबानानै
गोदान मिथिँगानि गोगो हांजोँ सुजुगोन मेथाइ,
गोदान जावरिखांनाय दैसानि गोसोजोँ
रोजाबगोन मेथाइ गारां हगार हगार।
हे बैसागु! देग्लाय हरसे खुग्लुबना थाब्लाबो
गाज्रि मोन्नो मोन्नाय नङा सयथिबो,
दहाय फाफ नांगोन बैसागु नोङो
फैदो माबार हरखौ सान खालामनानै