आंनि खन्थाइनि दाउथुआ रोजाबो Poem by Ronjoy Brahma

रेलजोँ दावबायनाय समाव
गामिनि बारआ नोँखौ बिदायहरो-
रेल ष्टेसनाव।
आंनि गोरबोआनो दोँसे खन्थाइ
(खन्थाइ: आंनि बिखानि आमाय थख्लनि थैसाम)
खन्थाइफोरानो आंजोँ गेलेयो रेल दाबायाव,
मोन्दांनाय आरो सहैनायनि मेथाइ खनो।
आं आंनि सुबुंफोरखौ गुस्थि फेन्नाय नुबाय
सुजाबफिन्नो लुबैयो आंनि खन्थाया,
इनाय आयेन-बिसारखौ लागाम होनानै;
मानोना दा हान्थिनाया इन्टारबेल जाबाय।
जोहोलावनि मावथाइफोरा जेरै जिनिर नाङा
अखाफोर एबा साननि मेगनाव,
आंनि खन्थाइनि दाउथुआ रोजाबो-
गोदै मेथाइजोँ बयनिबो गुस्थिखौ मोसाहोनो।
लोगो दाबखानि गोदोनाखौ दाहम
बियो जोबोद रागा जोँखाङो,
आन्दायनायनिफ्राइ ओँखारबो दावबायनायाव
बेनोथ' जिउ!
सुज्रायनि एमाव समखौ बेसेबां रुंगहोनो?
गावनि बिखा खंख्ला अन्नायजोँ
अनजालिखौ दैखांना सोर जावलाङो जिउ दिङा?
लामा दोँसेनि थाखाय बयबो खालाव-खासाव।
मोदैनि सान-बेन्दोँजोँ फानफ्रब जानानै-
आयनि माथोआ रानखाङो आरो सिग्लाबो,
दुखुखौ रुजुन्ना सोर दुगानानै लायो?
बियो गांगाहोनो हानाय दैहु नङा।
दुखुनि गुबुन बिथिँआ जादोँ मिनिनाय
आंनि खन्थाया बेखौनो हास्थायो,
आरो आंनि खन्थाइनि दाउथुआ रोजाबो-
मिनिनाय नागिरनानै- मिनिनाय जरासे गुस्थियाव।