गांखं जांख्रिनानै अख्रां नायहरनाय Poem by Ronjoy Brahma

नोंखौ लामायाव लोगो मोनब्लाबो रायज्लायनो हाया
सान हाबनायनि सिगां नआव गिदिंना फैफिनब्ला
रजे मानोबा नोंखौ गोसोखांनाया दाबलसिन जायो
बैग्रि गोमोन सिरिनायबादि गोग्लैनानै थायो आंनि सानस्रि

आंनि देरानिफ्राइ नोंखौ नायहरखोमानोबो हाया
दा गोसोआ बेसेदि जारला माबोरै माबादियै बुंगोन बाथ्रा?
नै मागो थांनानै फैबाय फागुन दानआ
दंफां सौग्रा दाउआ गोसो होनानै थर थर दंफां गोरान सौओ

नै अनजालि आंनि आसिन दाननि बेसर गोरलै
हफाय लांथों आंनि सेंगोरा गोसोआ नोंनि थाखाय
थांनानै थैनो फैदों थांनानै थैलांगोन बे हायाव जेबो अरजाया
जेरै हांगोन मोनदा नुनाय समाव दाउज्ला गेसेरबानो स्रां मोनो

माय बिबारबादि नोंनि गोसोआ जोबोद गुमायलुं
बिबार बारफुनाय बोथोरनि समायना हायना महर
अख्रां नायहरनानैनो आं दानिया जोबोद मोजां मोनो
अख्रांआव नुयो नोंनि अनथाव-बाथाव मिनिस्लु मिनिनाय

सिमांआव आं न' लुदों दैसा सेरनि गोदान नबथिआव
बिजौ गैजायै सियान बिफांबादि आंनि हालोद
थेवबो गां रजदों आंनि मोदोमाव बिरदावलांगोन
गोबा गुस्थिआव बिबार आरो मेथाइ लाना उरां मारिनानै