जेथोनि बारा बारबोगासिनो बारबोगासिनो Poem by Ronjoy Brahma

जेथोनि बारा बारबोगासिनो बारबोगासिनो
दाउस्रिनि बिदै लोँनानै खौऔआ
नुयै गुदु अरनखौ नायहरदोँ थाखोमानो
बिफांनि थिखिनियाव दान्दिसे मिलौहाब रोजाबनानै।
सोलायबाय थायो दुलुर बुहुमनि गाब
गुस्लायबाय थायो मिथिँगानि महर-मुस्रि
बिनिफ्राइबो गोमोथावसिन मानसिनि गोसोआ
थगायबाय बोसोर गोदानाव खोथा होनाय।
गारांआवनो अनसायजानाय आवलुरि खौऔआ
मालायनि बासायाव बिदै दैयो गुबुननिखौ लोँनानै
बेबादिनो आंनि गोरबोखौ फोजोब्बाय नोँ
होनानै गालांबाय गावनि गोरबोखौ।
जेथोनि बार बारबोना जेथोसिन जाबाय बुहुमा
जेथोसिन जाबाय उदां नागिरनायाव
जेथो गोनांसिन जाबाय जोँनि जिउआ
जेथो रंजानाय मिनिनाय गाबनाय दाहानि।
मोदैनि लैथोमायाव दिङा जावो लोरबां सोलेर
जोमैया होसिन फैयो दाउथुनि गांखं
साना नुजाहां-नुजायाहां सानजाहा
बनजार थिखोना लामा नागिरो जोहोलाव
लामाखौ आन्दायदोँ मानोना दिनै हाथर्खि गैया अख्रांआव।
अलंबार नुजानायमोनब्ला बुंनो हागौमोन-
सिन्था गैलिया सोरांसिगोन सोरांसिगोन