पिरामिडबादि थाम खनायारि सावरायनाय
बेसेबांदि गले गले थांदों बड'लेण्डखौ दुलुर आरांगायाव दोन्नानै,
बड'लेण्डआ हाब्रु, बार दैजोंनो दाजानाय
मोनहां मोनाहां गावनि मोन्थाइखौनो खोमानांनाय
जुब्रा जानाय आबादारिफोरनि दुब्लि बियो।
सम आरो दान बैसोआ बेसेबां जाखो?
पिरामिडखौ बोखे-बोखा बुब्लिखौ सोगाब्बाय थादों,
आबादारिफोरनि मोखां सेराव नुहां-नुवाहां।
दिनै बुरलुंबुथुर दैमाहालाय माथो खौरां?
अनसायजायै बुंफोरथियावसो दं आंगोथिया,
खर' थिखाङो मावथि आबादारिफोरा
दैज्लां फैबाय बोथोर गोदाना फैबाय होन्नानै।
हा फिसा हौवा दाउआ मा मेथाइखौ रोजाबनो?
अखा हानायावनो जोबोद मोजां खन्थाइनि थाखाय,
दुब्लि गोबानानै अखानि फिथरा मोसायो
हाद्रिजों बिसम्बि जानाय बिलाइनि हाद्रिया सुस्रलाङो।
अखानि उनाव सनानि बिलाइ जानानै साना फैगोन
खोमसिया खामलांगोन सोरांनि जोंब्लावनायाव
जोबोद गोदै मेथाइखौनो रोजाबो अखाया
आबादारिनि गोरबो बाबेनग्रा दुखुखौ बुरखायनानै।
अखा हानायावनो मोजां बिफांफोरा मोसायोब्ला
रंजानाया ओरैबादि हाइना सारफावनानै होयोदि-
बुब्लिनि सिगांआव बियो खबाम दैखाङो,
गासै समायनानि सोलेर जानानै मिथिंगाया
खौसेथि मेथाइनि हावार अख्रांखौ अरसिनहोयो
दान्दिसे मोसादिनि अख्रांनि गोदै खबामसो बे अखाया
This poem has not been translated into any other language yet.
I would like to translate this poem