दाउसिनफोरनि मेथाया बेसे गोदै Poem by Ronjoy Brahma

जोँनि आखाय फारनैजोँ
फाफ्लियाव सैनानै दामनो गोनां जानाय
खामजोँनो गासै खामा जेन्नाङो
आथिखालाव बे खामखौ सोर दामगोन?
बे बोथोराव खम्बल सेलायैयानो गाहाम
मानोना सानखौ लावसिनहोनो हायो
दाउसिनफोरा गावसोरनि मेथाइजोँ,
आदार नागिरनाया बिसोरनि मोन्थाइनि खबाम।
आबै-आबौ आरो आफामोना
जाय सिमांखौ जोँनो गथायबाय
बे सिमांखौ आवथिना माखन दिहुन्नांगोन
जाय मोन्थाइ बियो जोनोम जोनोमनि।
हालुवा आबादारिनि
मोदै आरो गोलोमदै सुबुं सोदोमस्रिनि
गोगो नेर्सोन बियो
गोजोन रंजानायनि खुलि।
मेगनगोसाफोरा- बेमारिया जेन'बा
दाक्टारनि बरिबादि आंनि बुहुमखौ ग्लब मन'बाय,
आरो बिसोर बाज्लखांनानै
हिमालय एभारेष्टखौ फेजेनगारबाय।
बुरलुंबुथुरा दाबो सोमावसारनो थुलुंगा होयो
खबामनि दाहार लागाम होनानै,
मानोना गाबोन जोँ बिरग्लांनो हागोन
जिउनि सोरांखौ आंगोथि खालामनानै