आंनि मुङा नोँनि खुगायाव रिँखाङोब्ला
एबा खबामनि गासै बुब्लिया गोरबोआव गेलेयोब्ला
आं दोँसे मेथाइ- मेथाइनि ओँथि,
आसिननि रैसुमै बारबादि गुरै सुदेम।
गोरबोसिंनि गोथौ फुलुंनिफ्राइ जाखांबोनाय
सानबादि ओँखारबोनाया बिलिरदोँ गुस्थिखौ,
गुस्थिया आरो आंनि मुंखौ गाबज्रिदोँ
मेथाइ जानानै बाज्लखांदोँ अख्रां गोबानो।
मोजांमोनो नोङो मोजां मोनो रजे!
जिउनि खेँफोरथिनाय मिजिँनि लाइजाम फरायनो
हाबिलासा सिला जानानै बिरल्लाङो-
गोबौ आसुगुरखौ फोरानानै जाफुंसारनायनि मेगनजोँ
आंनि मुङानो जेन'बा नोँनि अक्सिजेन।
खुसिजोँ मिनियो सान जायख्लंनि दालांआ
बारबादिनो बोराबनो रोङा जारौ गुस्थिनि मेथाइ,
मोदैनि खफ'आ हान्थु खेरायो आथिँआव।
आं मेथाइ जानानै अख्रांफारसे बिरलाङो
आसि थुनानै दिन्थिहरो रांखोआ फिसाफोरनो,
आरो बारनि आखायजोँ बिलिरजानाय बिबारबादि
गथ'फोरा मोसायो गाराय गोनां फोथाराव।
अख्रांआ आबुं जानाय हाथर्खि-अखाफोर,
जायखौ दिन्थिहरनानै आबै-आबौमोना गथ' बुरखायो,
मिथिगौ उन्दुनानै गोसोनि मेँनाय होखारजाया
मेथाइ जानानै मेंगाहोनो लुबैयो आं।
मुखुब बुब्लिनि सोरलाब आबादारिनि देहाया
जेरै आबादनि मोदोमनायाव लोरबांथिया दहलाङो,
दाउराइ गांनि एमबादि मेथाइ जानानै
थैरोङै दावबायनाय साननि रोदा रोदा।
आं सान्दुं आरो अखानि रुगुं सानस्रिग्रा
बुब्लिनि मेथाइ आरो खबाम,
बेसेबा गांखं फुवारना बिरग्लांनो लुबैदोँ
This poem has not been translated into any other language yet.
I would like to translate this poem