आरिमुगिरि बिष्णु राभाया बुंनायबादिब्ला
बर'नि देवदाय हांखोखौ सुथुरा खावनानै लांदोँ!
जोँ मिथिगौ बर' बिमाया जोनोमहोनाय
राभाया बर' जारिमिननि बिथा सोरजिलांबाय।
राभानि मेथाया बर' बिमानि रावजोँ फोजायो-
'गोनाइ हारा गोनदो
ज' जादो बयबो ओँखारदो
गैया गिनांनाय
गैया एसेबो गावबा मालाया
सोलिग्राखौ फोजोबस्रांथारदो।'
रावखौ सोलाव लानो हायो
रावनि खहा आरो मुलाम्फाबो जायो,
सांग्रांजानांगोन सोदोमस्रि गाब्रायनाय मुगानि
बर' बिमानि रावखौ अनसायनो सेंग्रा-सिख्लाफोर।
मिसनारिफोरा दाबो जोँखौ लफायो
जोँनि रावानो गोदैसिन ओरै होन्नानै,
ओजोँ सोलोगोरोँआ बोरसिजोँ गालखाबाव हायख्लाबो!
बिमागैयैबादि जेन'बा रोनावनांबायदि।
जोँहा गासैबो दं बुरखायजानो नाङा
सेन सारफावनाय हाथाइनि बिबारनिफ्राइ
मोदोमनाय गैयै हाग्रानि बिबारानो साबसिन,
आयनि गोदैसिन राव बहा थानो हागौ?
अखोरां सेराव दाउ खखिलिँआ रोजाबो आयनि रावै
गोदान बोथोराव खौऔ दाउआ रोजाबो आयनि रावै,
बोथोर थांनाय बोथोर फैनाय मिथिँगाया सिनायथि होयो
बर' आयजोनि बायदि दखनानि गाब।
बुरलुंबुथुर, हिमालय आरो दिमाफुरिया
आयनि रावैनो जारिमिननि मेथाइ रोजाबो,
बिनिफ्राइ गोदैसिन आरो मा थाबावनो?
जोँनो नांगौ मोजांमोन्नाय गोसो,
जाय गोसोआ जोनोमनिफ्राइनो फैखानाय।
गावनि राव-फाव मुस्रिखौ खोमाबोला
आवबा जागोन लोगोफोर जोँबो थैलांगोन।
मिथिगौ आयनि रावादि बेसेबां गोदै
दाउथुआ लानानै थाङो अख्रां सायाव,
हरफ्रोम अखाफोरा खोनासंङो मुगानि उनावबो
जेब्ला आयआ जोँखौनो बुरखायो-
अखाफोर अखाफोर आगैजोँ गेलेनि फै।
हे सान आरो अखाफोर हाथर्खि-हाला
नोँसोर थागौमानि जोँबो थाबायथागोन,
आयनि गोदै रावजोँ रायज्लायनो
आयनि रावै मिलौहाब मेथाइ रोजाबनो।
जोँनि खौरांखौ नोँसोरनो फोरमायना हो
मुलुगनि असिना दाउसिन-दाउलाफोरनो
दैमा-दैसा हाजो एम्फौ-एनलाफोरनो
This poem has not been translated into any other language yet.
I would like to translate this poem
नंमारगौ