बाराखौ मा बुंनो Poem by Ronjoy Brahma

खाबु मोनोब्ला एनजर इंगिनियाबो
खायदा बोरायखौ बाहायनानै
दांसलियानि लानजाइखौ अरसना होयो,
जिबौआबो जिबौनि आथिँखौ सिफायो।
बेसेबां स्रां आंनि गोसोआ दिनै
मोखांआव नायनानै सोरबाखि दिहुन्नो हायो?
गाबनानैनो नोँ दिनै दुखुखौ होखारदोँ
आरो बेबादिनो सोलेरा दहलाङो।
सानै फहेरादारफोरा उन्दुनो सिमा सेलायनायबादि
बिसोरनिनो दावरावखौ दाउसिनफोरा मेथाइ खनो,
मेगनावनो गोजोनै एरसोयो आंनि मोदै
जरासे गुस्थियाव थाखोमायो गुमुर,
बेबादिनो आं जिउनि दुखु होखारदोँ।
फेँगुन गांनि बिदिन्था गोलोमबोथोरा
आंखौ बोजबना लायो थेवबो
आं सिमां नुयो दुंबुर गोजां बोथोरनि
आबौ, जाय सिमांखौ बियो आंनो होलांबाय।
थैनि सोमोन्दोखौ खन्थुमै खन्थुमै
गंसे खुरैयाव दोनोब्ला खुरैया बाज्लखांगोन,
आरो हाबिलासनि खन्थायाव बिरबायनाय दाउथुआ
आगर एरखांगोन अखोरां सायाव।