नोँथ' आरो नोँ असे फाग्लाखा
आंखौबो गोदाव-सोराव गिदिँबायहोयो नोँ,
समा नेया बिनि गोरबोआव
गोदान बुहुमा हाबसनफैयो,
नाथाय सानबोलावरिया एक्यरियमआव जोबथे जानाय आंनि।
खै खै मिनिनानै खाखोरा लाजिफोनाङो
खन्थाइगिरिनि खन्थाइ लिरनो हायैखौ नुनानै,
जोँ मिथिगौ, जोँ मिथिगौ मिथिया नङा।
रायखसनि देदगानायखौ टीभीयाव समायनायैनो दिन्थियो
खोनासं सिखोना जाहाराव बावदियानि सेरजानि देँखो,
खैनासान्थिनि मोदैया दैसा जानानै बोहैदों
गारांनि लैथोमा बारलांनानै हरै मा दं?
मेथाइखौ आवथिनानै माखन दिहुनगोन आं।
गारांनि बोहैनाय खबामनि बाज्लखांनाया
अख्रां मोनहैबाय जोमैखौ होसोबाय,
आंनि मोदैजोँ हाजो जानाय नेर्सोनखौ
जोफ्रुनानै आं लैथोमायाव दालां सोरजिगोन।
दाउखाया लानानै फैनाय खोमसि बुब्लिखौ
नोँनि गारांनि लैथोआव सानस्रिनानै
हानजा हानजा दाउसिनफोरा खेबख्ला फैदोँ,
गोदान दाहार मुलुगनि सेराव गसंनि आं।
आंनो गेबेँ आथिँ थोँनैखौनो नांगौ
जाय आथिँआ हान्थिलांबाय थायो
मेगननि मोदैखौ मननानै दावगानो सानो
देबोर नांनाय जिउखौ फाहामनानै।
मिथिगौ गोलोमदैनि बोहैनाय दैसायाव
गासैबो बिफां-लाइफांआनो गोजोमफैगोन,
गुरुदेबा बे मेथाइखौनो रोजाबदोँमोन
बर'नि उदै सुफुंग्रा गंगार हाजोनि दैजोँ दुगैनानै।
नोँनि मेथाइजोँ आंनि मोजां मोनलायनायाखि दानिल'बाव?
गारांनि लैथोआव गोजोम फैगोन बयबो,
लैथोआ खुसिजोँ बाज्लखांगोन दोहौ जानानै
दोहौआनो रोजाबो गोदान मेथाइनि रेगा।
This poem has not been translated into any other language yet.
I would like to translate this poem