गाथोन गाथोन Poem by Ronjoy Brahma

संग्रायनिफ्राइ सानद्रिसिम जिउनि दावबायनाय
आह! बेसे गोमोथाव, बेसे गोमोथाव
आथिखालाव गामिया बायफ्ले बायफ्ले
नोगोरनि महरै गुस्थिगैयैबादि मिनिग्लाबो।
जोमैबादि मोसासुलि रावबो अख्रांआव गैया
हां बोख्रबनाय अरननिफ्राइ जोँ बयबो नुहरो,
जेथोनिफ्राइ आसिन बारआ ओरैनो बारा
हमबाय थायो बियो सुखु-दुखुनि आन्थोर।
सैथो आरो नंखायनि बुहुमखौ
सानद्रिया आन्थोरजयै फिदिँबाय थायो,
बेबादिनो जोँनि आगुआ गोमालाङो
सानजानि फैसालि हांखोआव थाखोमानानै।
गाथोन गाथोन लंथंङै दावबायनानै
एखमबा आं बुहुमखौ थोबसे मेगननि मोदैबादि नुयो,
खन्थाइनि थै जिरिनायखौ खाखोरा नेनानै दं
थैजोँ सोमोन्दो गोनां जारिमिन लुनो।
जेन्थोरनि खुन्दुंआव बायदि खबाम दोरोदनाय
गासानि जारिमिनाव सोरां आरो खोमसिनि ओँथि,
आं गाथोननि सासे दावबायारि
दावबायदोँ बिखा संफ्ल'आव हां बोथुमनानै।
बर'लेण्डआव मैयानिफ्राइनो अखा मोफ्लामदोँ
डिजिटेल केमेरानि मोफ्लामनाय नङा बियो,
अनजालि सिख्लानि जारौ गुस्थिखौ सेबखांनो थाखाय
गुलिनि मोफ्लामनाय बियो, खबामनि खोरोमनाय