बोथोरा गोदानै फैफिनबाय Poem by Ronjoy Brahma

बे खेबाव देंखोगिरिनि मेथाइया गारां बुब्राबो-
दैदेनगिरियादि गांगाथफायाव दलर गाखोबाय,
ओंखामनि आंखाल आरो संख्रि बानलुनि बाथ्राया
गथ'फोरखौ खालामबाय फिन मुं गैयै बिदेसी।
मेगन मोदैजों हरखौ बारहोहरनाय हाथर्खिफोरा
सोरांनायनि सिगां बबेयावबा खारखोमालाङो,
थेवबो साननि मेगनाव सोरां सारफावनायनि हाबिलाजों आबुं
अख्रांनि गासै जोमैखौ लामफैथा होखारनो बबेयावबा
मोनसे बुब्लिनि उसाव-बादाव मोनाबिलियाव
खानाय रुम्बां हाइनारि सिख्लाया मेगन थिफायो,
मेगनखौ इनायनो आमोल-दिमोल गेलेहोनानै
जिउनि गाथोनाव बेसेबांबा लाबोयो गुथाल।
गोजाम बिसम्बिया बारग्लांनाय सायखंफोरबादि
रजे, नोङो दिनै मानोबा जायख्लंबादि समायना
अन्थाइनि खाफालाव दलरै नोङो गसंफैब्ला
सोर्गोआव हरखाबैनो बिरखो लांगौमोन खोमा।
दिनैनि रोजा खोमसिया आंनि मेगनखौ सुथेथों
थांगोन आं थेवबो जिउ लानानै नोंनि सेराव,
होरलां दिङाया आंनि आथिंखौ फोजावहरब्लाबो
रोजाबगोन गावनि गारांजों नोंनि मुं खुन्दिनानै।
मिथिगौ, मिथिगौ आङो हार्सिं जिउआव निन फैया
बेसेबांबादि सिगारेडनि फेरुरु मोनामनायबादि दुखु,
फेरलेब-फेनथेब खुसिनि मोखांआव जाखांफैदों
जारिमिननि मानसावगारियाव जोंनि हान्थिनाय आगान।
दिनै गले गले सोरांआ खुसेरफैयो हरनि मोखां
अखाफोरनि दखना फालियाव उन्दुस्रिनाय जोमैया
सिरिमोन्नानै बबेयावबा स्रोद खारलाङो सिरि सिरि,
नबथि गोमाजानाय आंनि आइनि उन्दुस्रिनाया
सोमावग्लुङो मेथाइ जानानै गुसेब अख्रांखौ गुवार खालामनो।