अमाबैसा फैयो अमाबैसा थाङो Poem by Ronjoy Brahma

अखाफोर दानसेनि उनाव अखाफोर दानसे
अमाबैसायाबो फैयो आरो थाङो,
जोमैया सोगोमो हुरागासे हार्सिँङैनो सिरिथाफिनो
रामोन्दाया दुब्लिनिफ्राइ आबादखौ हुथुम-हुथाम खंख्लायै लाबोयो।
जोँ सोमदोन, बिरगोस्रिमोन्नि थुंग्रिखौ बावबाय
एके नङा रायपलजोँ जोँनि थैया सिददावदोँब्ला
एके आरो रायपलखौनो जोँबो हाथिरबानायबाय
बेबादिनो थैजोँ थैनि फिन्नाय मोनसे मुगा थांबाय।
थेवबो बिखाखंख्ला दावहारुनि थैनायनि खौरां
रामोन्दानि नासिना-सेर्जानि बैदासि देँखो,
नै आदा बासिराम! जोँलाइ रावखौबो गिया गिया
नाङा नांलायगोन दावहाखौ सुथुरजोँ।
नाथाय बर'फोरनि रागा जिगाबनि अर
दिनै दावखोदोँ गाबोन द्रोद फावसायगोन,
बिखा फोलोमनो हायै जारिमिनाबो जोँखौ दुखु होयो
सानसेबा मायबां, सानसेबा दिमाफुर-खासफुर।
समाज फोसाबग्रानिबो आंखाल जोँहा
सिजौ बिफांआवबो मानलाबाय लेवा बेन्दोँ,
जोँ घोरोमखौ माबोरै फोथांना लाखिबावनो?
खामानियाव गैया दाबखा थायसेखौ बेँखन्नायाव खामफ्लाय थोआ।
जावलिया-बिरगोस्रीनि थुंग्रि मोदान्नाया गोमालांनायबादि
गुरुदेब कालिचरण ब्रह्मनि आगानाबो गोमालांगोन नामा?
जाय आगानाव दंमोन खौसेथि आरो गेवलांनायनि मोदोमनाय
गोजोरै थांनानै थानायनि गेदेमा दाबिनाय।
गुरुदेबनि Clarion call, Renaissance जोँ गोसोआव दं
नाथाय दिनैबो जाफुङाखिसै Bodo Regiment अरफे
बड'फानि Separate State Bodoland
इयुन जोलैनि उनाव इयुन जोलैफोरनि थाखाय!