हाग्रामानि सल' गोसोथोनाय: से Poem by Ronjoy Brahma

उन्दै बैसोआवनो बिमा-बिफा थैजानाय
सासे आलाइ-सिलाइ गथ' दंमोन।
बे गथ'नि महरा नायनो साबथारा
बयनिबो मोखांआव हिन सानजानाय।
गुंख्राय आरो गुंखियानो गन्थं बुंजासे
खोमायाव खोमाखिया दाखा दाखा।
मेगनाव मैखिया खाब्रे-खुब्रे
बिनि जोनोमनि मुङा जादोँ बेरल'।
सानसेखालि बियो बा बोसोर बैसोआव
गिदिँबायना लावथि माहाजोननि लांगोना मोनफैयो।
सासे बिजि आरो सानै फिसाजो गोनां
लावथि माहाजोना गायखेर सेरदोँमोन।
दानसे सिगांआव लावथि माहाजोननि लावखारा
थफ्ला-थफ्लि लानानै नआव खारलांदोँमोन।
बिनि उनाव गंनै गलिनि मोसौ बाथोनखौ
लावथि माहाजोना गावनो गुमनो गोनां जायो।
माहाजोननि सेराव फैनानै गथ'आ बुंबाय-
ओइ आदै! बेफोर मोसौखौ गुमनो आंखौ लाखिदो।
आंहा जिउआव आंनि अनगा रावबो गैया
बेफोर मोसौफोरा आंनि जोबोद आंगो।
बेखायनो आंखौ लावखार खालामना थानो होदो
हालो-दैलो थांथोँ आंनि जोनोम सानफोरा।
माहाजोना बिनि महर-मुस्रिखौ नुनानै
एखेबारे मुगैनो ओँखारसो गारदोँमोन।
लावखारा गावनो मोसौ गुमनो सिमान जाफैदोँ
माहाजोना गोसोआव रंजाखांबाय।
मैयासो बिमानि आबु नागारनाय गथ'लै नोङो फिसा
थेवबो नोङो आंनि मोसौखौ गुमनो हागोन।
हाथारगोन होन्नानै आं फोथायो गथ'
नोङो दिनैफ्राइ आंनि मोसौखौ गुमदो।
नाथाय नोङो आंनि नआव हाबनो मोना
मोसौ गलियावनो थानांगोन गथ'।
बे साननिफ्राइनो बा बोसोरनि बेरल'आ
लावथि माहाजोननि मोसौ लावखार।
माहाजोननि सानै फिसाजोफोरनि मुङा
देलाइ आरो मालाइ नायनो समायना।
बिमा लामब्रेया खख' खांदोँ बिसोरखौ
बेसेबा हालो-दैलो थाङो बियो साना।
दिनैसिम बुहुमनि महर आरो मुस्रिखौ
बिसोरो गावनि मेगनजोँ नुफेराखै।
मोसौ गायखेरजोँ लुथुरफुथुर देरनाय गथ'
दाबो बिसोर मोसौनि गुमुर मोनाखै।
लासैनो जि बोसोराव बिसोरो
लाइमोन सिख्लानि रंगिना महर मोनफैयो।
ननि बेरानि सिङाव थानानै बिसोर
सानसेखालि सिफुंनि देँखो खोनायो।
लाइमोन गोसोखौ सिफुंआ बोदोर खालामो
गोसोआ खामो बिखाया माय सोवो।
खबामनि गुमुर संदाननो सिबायफोर नाजायो
हर आरो हर उन्दुनाय गोमालाङो।