हाग्रामानि सल' गोसोथोनाय: थाम Poem by Ronjoy Brahma

सानसेखालि जोबोद गोसा सानसुथिर समाव
लावखारा गोसोहोना सिफुं दामनो हमबाय।
बिनि मिलौहाब सिफुं सुनायाव
अरननि सिख्लाया फैनानै बुंफैबाय।
नै फंबाय! नोँनि सिफुंआ बोदोर खालामो
नोँनि देँखोआव आं दुगैनो लुबैयो।
दिनै नोँनि सेराव फंनैसो बाथ्राबुंनो
बेसेबा गोजोनग्लाय गोजोनै आं नुजाफैबाय।
जेखिजाया नोँनि गोसोआव मोनसे दुखु दं
फंबाय आंनो फोरमायनो हागोन नोँ?
अब्ला आवबा जानानै लावखारा बुंबाय-
नै आब'! नोङो फैदोँ जोबोद मोजाङानो।
गासै जिब-जुनार आरो मोदायफोराल'
आंनि मोखां सेराव जेब्लाबो गसंफैयो।
नाथाय बुहुमनि मानसिफोरादि मानो बेबादि
मानसि जानानैबो आंखौ मानसि साना?
आंनि महर-मुस्रि आरो सोलेरखौ नुनानैनो
आय-आफाया आंखौ गारनानै थांदोँ।
मानसिनि फिसाया मानसि सानजाया इनाय
बेनिनो दुखुआ आंनि आमाय थख्लआव।
सिफुंनि देँखोआ गथाय मुलुगनो फोरमायो
मोदै बोहैहोयो बुजिगोरोँ गेदेमाफोरखौ।
अरननि मोदाय सिख्लाया गुरैयै बुंबाय-
नै गथ' बयनिबो अनजाथावसिन मुलुगनि।
नोँनि गुण आरो गेदेमा सोलोआ
नोँनि महरनिख्रुइबो बेसेबा बाखोनायथावसिन।
खोनासं फंबाय सोर्गोनि बाथ्राखौ बुंनि
मानसिफोरा नोँखौ मानसि साना नोँनो सान।
मुलुगा अननाय आरो मुगैनायजोँनो गफबनाय
मुगैजानायनि दाबोराव नोँ गोग्लैफैदोँ।
नोङो अरायबो मुगैजानो नाङा बेखायनो
जिउ थासान्दि गोथौ हाखरनिफ्राइ नोङो नाजा सिखारनो।
खोनासं फंबाय आंनि आरोबाव बाथ्रा
बे हाग्रामाखौ नोङो मन्दिर सानदो।
हाग्रामाखौ साखोन-सिखोनै लाखिदो
जिब-जुनारनो फोरमायना हो मोजां बाथ्रा।
जेराव नोँखौ बयबो अराय मुगैयो
नोङो नाथाय मुगैजानाय अघोरोम नङा।
नै गथ' नोङो घोरोमनि गुबै फिसा
गेदेमा हाग्रामानि फिसा नोङो।
जाय हादोरा नोँखौ आरो गुबुनखौ मुगैयो
बे हादोराव जेबो सोरां गैया।
बे हादोरखौ नोँनि सोलोजोँ गाग्लोब
लांसुनिया हादोरगिरिनि थाखाय हाखर जाव।
मोनसे दैसा बोहैनो जाम्फै बानाय
बयबो अनलायनायनि थाखाय बिफां गाय।
गेरेमसा बिफांनि बिलाइनि मोदोमनाया
बयनिबो गोसोखौ गोथार खालामो।
बाथ्राखौ बुंनानै मोदाय सिख्लाया
बिलाइ साजोँ थाबायलांनायसै गोथौ हाग्रामायाव।