हाग्रामानि सल' गोसोथोनाय: बा Poem by Ronjoy Brahma

सानसुथिरा लासैनो गोमालाङो बिदिन्थायाव
समायना अख्रांआव गेवलां महरलानानै बेलासिया सफैयो।
दैसानि मिनिखुसि बोहैनाय खबामजोँ गोरोबनानै
बिनि गोगो बिखायाव ददेरेया दुगैदों।
मानै बंग्लाया दैसानि फारनै रुगुंआव
ददेरेखौ नेनानै थेन्थौलाङो गोदो गोदो।
बिफां सानिफ्राइ ददेरेखौ नायहरो लावखारा
गोसोआ बिनि आवलिनायाव उसुखुथु बेसेरा।
ददेरेनि आबुं जौमोनखौ बियो अहाजासे नायो
फाग्ला बोरखाङो सेंग्रा गोसोआ मोथो मोथो।
दैसाया बाला अन्थाइखौ गोबाना बोहैनायबादि
ददेरेखौ बियो गोबाना लानो गोसोजायो गोदो गोदो।
हाग्रामायाव दाउसिननि मेथाइजोँ जेरैबो आराव
बिफांनिफ्राइ ओँखारना लावखारा फैबाय सेराव।
बियो ददेरेखौ गुरै माथोजोँ रायदावनो सानो
ओजोँ ददेरेया बिखौ नुनानै बागदावखाङो।
थेन्थौगोमानाय मानै बंग्लाया सिरिमोनो
ददेरेया गोख्रैनो बंग्लानि बिखुंआव थाखोमायो।
हरखाब जोँखांनाय बंग्लाया लावखारजोँ जुजिगारबाय
लावखारा बिजोँ हाजासे खमलायबाय।
मानै बंग्लाया लोगो लानानै लावखारखौ
बारनानै जोसिन सौसिन दोखो फेजेनासै।
बियो आरोबाव खमलायनो हायाखिसै बेसेरा
दैसा सेराव बियो उन्दुसोना थाबाय।
मैना दाउसिना मोख्राफोरनो खौरां हैबाय
मोख्राफोरनि नआव सहैनायसै लोरला लावखारा।
गासै गोसोनि बाथ्राखौ बुजिनो गोरोँ मैना
बियो ददेरेनि खोमायाव रोजाबो गोसोथोनाय।
सिबाय ददेरे थेवबो बियो जेबो गुमुर मोना
रंजानाय आरो गेलेनायजोँ बिनि गोसोआ थैहाबनाय।
मोनसे समाव अरनाव आराव जानायसै
हाग्रामायाव गेदेमा दावहानि हांख्रायनाय।
हारि आरो फोलेरखौ लानानै गोग्गानाय
गोहो गोनांआ गोहो गैयैखौ नासयनायसै।
सानसेखालि हाग्रामायाव राजा फाथिनायनि दावहा
दाउसिनफोरा बयनिबो खोमा खोमा रोजाब्बाय।
मैनाया खौरां होफैबाय लावखारनो
बियो आरोबाव खौरांखौ हैबाय बंग्लानो।