हाग्रामानि सल' गोसोथोनाय: स्नि Poem by Ronjoy Brahma

हाग्रामानि राजा जानो लुबैनाय एसेल' गोसो गैया दान्थालहा
गावनि सुन्दायखौ थिखोदावना गमादाव नुजाफैबाय।
बिखौ नुनानै हाथाइ मेवबाय जासुलाहा
बारगासिनो बियो दान्थालनि सेराव गसंफैबाय।
जेसेबां हागौ खेबसे दान्थाला होख्रावासै
माथ्रिनांनानै दुगा मोसाया जसोगारनायसै।
हरखाब जोमैया अख्रांफारसे जौखोलांबाय
बंफांआव बाबथाबनाय बेरेफोरा दारलाब गोग्लैबाय।
दान्थाला फिउ बारनानै जासुलाखौ गानो सानो
जासुलाया गोख्रैनो एरायना होयो।
सानफाथोलो बिसोर रावबो जेनाखै
मोनसे समाव मानैबो लोरला जानो हमबाय।
बे समावनो खिँगुर गान्दाया जासुलाखौ सौथारफैबाय
मेँग्लिनाय जासुलाया जेबो उदिस मोनाखै।
फिसा-फिसौ जुनारफोरा ओरैबादि रंजाखांबायदि
मोसा फालोआ लाजिनानै एरसोहैबाय।
खिँगुरा गले गले गंजोँ सुग्लिनाय समाव
दान्थाला बिखौ खिबुआव नारना खुन्थेँहोबाय।
गिलुबालु दावहा जानायसै बिसोरनि गेजेराव
मोनसे समाव दान्थाला खिँगुरखौ फेजेनगारबाय।
खुसिजोँ जेब्ला दान्थाला दान्दिसे जिरायनो सानो
गाल्फा फुवारना फिथिगमा नुजा फैयासै।
दान्थाला बिखौ सुन्दायजोँ फायनानै
बेसेबा गोजानाव फिउ गारहरगारासै।
हाग्रानि मोसौआ गोरगोर खारबोबाय
दान्थाला गावखौ गिनायबादि बियो गावनि रागाखौ दिन्थिबाय।
खेबसे बियो हायाव गावनि गंखौ सुब्रेयासै
आरोबाव बियो आथिँजोँ हारां खुरासै।
बिनि दुगाखौ नुनानै दान्थाला होख्रावबाय
आरोबाव बिखौ नारनानै खुन्थेँहोबाय।
फिन बलदआ गं फिस्रिना होसो बोआसै
दान्थाला बिखौ खाफालाव नारना जसोहोआसै।
लानजायाव हमनानै दान्थाला फिदिँनो हमबाय
बिनि उनाव बियो फिउ गारहरबाय।
हरा लासैनो साग्लोब फैनाय लोगो लोगो
बयबो हानजायै हानजा थांफिनासै।
दान्थाला खुसिजोँ मिनियासै गोगो
फिथिगमा लाजिनायजोँ फाग्ला बोरासै।
एबार फिथिगमा गावनि हानजाखौ लानानै
दान्थालनि सायाव गोसायै गाग्लोबगोन।
बंग्लाहा फिथिगमनि फारसेल' गिनाय
मोस्रोम गोसाहा बाजोनि थाखायल' गिनाय।
दान्थालहा गिनाय दं हान्दिलरखौ
हान्दिरा जोबोद गियो लावखारखौ।