खन्थाइ जानानै थालांगोन आं बिसोरनि थाखाय Poem by Ronjoy Brahma

सिमां नुनाय आरो हास्थायखोमानायनिल'सो
मोन्थाइ दं आंहा नोंनि सायाव
बेनिख्रुइ साबसिन आरो मा मोननांगौ थाबावनो?
बोख्लाबनो हाया नोंनि बिखाखौ
मोस्रोमबादि सिरि सिरि बुद्रुखोमानो हाया नोंनि गोरबोखौ
अब्लाबो हाजारबार मोदै दिहुननानै नोंनो दिनथिखांबाय आं

मोननांगौ आरो जेबो गैलिया आंहा
बेबादि होननानै फावसयनानैबो थायाखै
मोननो हास्थायथारो आं

बेसेबांदि सानाय आरो आलौनायजों थैनानै थायो
मोनसे अनजालु गोरबो बिखा
खेबफ्रोमबो हरा उनदुनो ओंखारनाय आरो उनदुनो ओंखारै
आंनिसिम दावहानि रौरोथोन नारनानै लाबोयो
हरखौ जेन आङो खारखोमानानै थायो
उदिस लाया आं माब्लाबा हर फैयो

आंनि गोसोनि दुखु आरो हांमा
बेनि गोमानाय आरो फेलें जानाय गासैखौबो
बोनथुमनानै लानाय बेसेरा खन्थाइ
अनजालु खन्थाइ- नों बेसेबांदि आंगो आंनि सुखु दुखुनि

मोननो हास्थायनानै जेनबाय आं
आं थैनानै थांब्लाबो जेननाया आंजों थांफासिगोन
जोनोम जादोंमोन बाहागिफोरनि थाखाय
बिसोरनो आं मा होलांबावनो?
मोदै थरथिंसे ना खामखोनदा बिखानि हांगार
ना सानाय आलौनायनि हस्रिख्रावनाय सोदोब

आं आंनि दिखार गोनां जेबो होस्रिख्रावनाय होलांनो सानाखै
आं बिसोरनो खन्थाइ होलांगोन
खन्थाइयानो फोरमायगोन मोननो हास्थायनाय आरो जेननाय
जेननानैबोदि हास्थायनाय मिजिं लाबावनो हायो
खन्थाइयानो फोरमायगोन बिखानि सानाय आलौनाय
खन्थाइ जानानै थालांगोन आं बिसोरनि थाखाय मुलुगाव