गाबोननि हरा सोरां जामारोब्ला Poem by Ronjoy Brahma

गाबोननि हरा सोरां जामारोब्ला
आं उन्दै जाफिनगोन आरो
उसिफावनाय गोरबो बुंजासे खुसिजोँ
फोथाराव खारख्राव-खारसि गेलेगोन।
अख्रांआ जुदि बिबारबारिनि महर लायो
आं मेथाइ रोजाबगोन मुलुगनि थाखाय
गावनि गारमाखौ बेसेबा साजायै साजायै
बेबादि सोरांखौनो आं नागिरदोँमोन होननानै।
बे सोरांआव हिमालय हाजोखौ नुहरगोन
हिमालयनिफ्राइ बोहैनाय दैमा आरो दैसाफोरखौ नुगोन
दैसायाव गेलेनाय ना आरो हांसोसिलारि
बिफांनि दालाइ दालाइ दाउसिनफोरा देँखो बोगोन।
अख्रांनि हाथर्खिनि जोँथिमाथि रिथि-रिथावआ
सुबुंफोरनि गुस्थिनि फैसालियाव नुजागोन
मुलुगनि हायनारि गोमोहाब होनायखौ जेन' आं नुयो
अनजालिनि खावलायाव दिमफोलनि दोहौ।
जुब जुब अखा हागासिनो दं लोगो
सोमोगोनां मायाजोँ बुंफबनाय नोँनि रायजोआव
नेहाद अलसिया सुबुंफोरखौ फोजादोँ दैबानाया
मानोना सुबुंआ बोथोरखौ लाजिफोनांबाय