सानस्रि, जोँनि गामियाव अखा हादोँ Poem by Ronjoy Brahma

सोर्गोनि बिबारासो जेन गांगाथफानि महरै बारज्रुमफैदोँ
आंनि उन्दै समनि बिसम्बिफोराबो बेबादिनोमोन,
दा गांगाथफानि बाज्लनायखौ नायै नायैनो आं गोसोखांदोँ
बबेनि बारादि बबेजोँ बारलांखो गोसोआ उदिसगैया
उदिस दं सोलेराल' आंनो सुदेम होलांनायखौ।
सानस्रि, जोँनि गामियाव अखा हादोँ
आरो बारजोँ बिफां-लाइफांआ मोसादोँ,
सान्दुंजोँ दहायसो खामफ्राम जानाय मोसौआ
गोजांस्रिवदोँ; नाथाय बेखौ सहायनो हागौ बिसोर
मानोना अखाखौनो बिसोरो हास्थायबाय थादोँमोन।
अखा हानायावनो आंनि गुस्थियाव मिनिखांनाय
उन्दै समनि गोदै बिसम्बिया फैदोँ।
गोलोम बोथोरनि बन्दआव जोँ बायगरमोन
खदाल थिखोनो हाया आलि गाग्लिनाय,
खोथिया आखानैखौनो थिखोनो हाया
हाब्रुजोँ गादै लानानै मावथिनि सिनायथि।
सानस्रि, जोँनि गामियाव अखा हादोँ
लामाफोरा एखेबारे हाब्रु जाबाय,
अखा नागारबा सिलायाव दैस्लुं थागोन
थेवबो मोसौ बोरमाया खुसि गांसो खिलिगोनखौ।
बाङाइगामिनि सहराव अखा हादोँना हायाखै?
सहरनि हाद्रियानो आंनि लजिँआव बारसनफैयोमोन,
जोँनि गामियाव अखा हादोँ जोबोद खुसिआं
गोदोनिबादि लेखानि दिङा जावनो लोगो थानायमोनब्ला-
गोसोथोनायनि बाथ्रा सावसुबग्रा आंनि लोगोफ्रा बालागुदुंआव दा मुखुबसै।