बे खेबाव नोंखौ गोदान मेगनजों नायगोन Poem by Ronjoy Brahma

गोबावसै नोङो मेगनाव दैहु लानानै
लामा थाबायनाया
नोंनि आथिंनि जिफ्लेनाय सेन्देलखौ उरसिनानै
बेसेबांबा सु आफायाव बजाय जाबाय
फैथारदों नोङो अब्लाबो लामा संदाननानै

लामायाव सु दोननाय मानसिफोरा
जंखायनानै थांबाय नोंखौ मथर गारिजों
मिनिनानै थांबाय
नोंनि दखना फालियाव हाब्रु आरो हाद्रि लगायनानै

बे खेबाव नोंखौ गोदान मेगनजों नायगोन
बयबो फैफिनदों नोंनि सेराव
गुसुथियाव निमाहानि दिनदांनाय सोदोब लानानै
उद्राय जागोन ना जाया गोरोन्थिनि थाखाय
गोसो सिङाव गोदान मोसानाय
मोसाथारगोन थंब्लेद बारननानै उद्रायनाय मोनोब्ला

बे खेबाव नोंखौ गोदान मेगनजों नायगोन
मेगन सोलायनानै फैफिनदों बिसोर

नोंनि जामरोङै गोसोनि हाजार एमफिया
फामे बिबार जानानै जिरायगोन
मेथाइ रोजाबगोन सिखिरिफोरा