सोदोबखौ बिजिरना नायो आं Poem by Ronjoy Brahma

सोदोब नागिरो खन्थाइगिरिफोरा
सेक्सपीयेरआ
किट्सआ
सोरबा सोरबा जेन आरो रबि ठाकुरमोनहा
मुंनि सोदोबनि बान्थानि माला गानो बिसोरो
सोदोबनि फाग्लाथार होनबा फाफ जानाय नङा बिसोरखौ
हायेननि सुफिन सुगदावग्रा फ्रमद बाबु
बालाबगानै स्राय गारां बोनाय निला
रादाब दैबायनाय सोमह
दैमानि फिसा संदानग्रा जगदिस
थैनो एसेबो लुबैया प्रजिया। जिब्रालथरनि अन्थाइबादि
पस्ट मडार्ननि प्लट संदानदोँ सुनिलआ
सहराव न' गैजायै उथ्रिसार खुंगुर
मोसा फाख्रिजोँ आवा-फावा खालामजानाय बाग्लारि सार
सोदोबजोँनो गहेना दिहुनो लाहारी सार
राखाव सारनि खुगायाव गले गले मिजिँ सावगारि
बैसागुखौ मोजाङैनो मिथिगौ सानजारां
खेराय गारजानि बाथ्रा आरो जोँ बावलाङो
दुर्गा मुथिनि महरा मा एसे आजां-गाजां होनबा?
आथिखालाव खबाम दोरोदनाय आंनि जिउ
बानलु गोसा संख्रि गैया
हाल्दै गैया जानो बाथावथाव ओंख्रिबादि
जायोबा नोँहानो नाथाय उखैजानो गगोन
बाथ्राखौ बुंथावाब्लाबो बुंनांगौ जायो
चित्तरन्जन मोसाहारीनि थाखाय
जौ लोँनायनि फेनाय सलमानि फेनाय एखे बाथ्रा
जायखि जेरैखिजाया होन्नानै सानोब्ला
जोँ सोँखारिनो गोनां गैया आरो नाङा लिमारिकखौ
सोदोब
बायदि मुं गुन बायदि देँखो
आरो गोसोथोनाय फाग्ला खालामो नोँ इसान मोसाहारीखौ
सिलिँखार खालामो ट्रय नोगोरखौ
लंका आरो काछार रायजोखौ
(इरागदावा बिबाजै इन्दुफ्रभाखौ गोसोथोनानै जुलि खालामामोनब्ला काछार रायजोआ सिलिँखार जानाय नङामोन)
आरो खन्थाइ
नोँखौ मोजां मोन्नानै बेँगुरा जालाङो खन्थाइगिरि।
खायसे खायसे खन्थाइखौनो जिउ सानो
अनजु मेडामा सोदोबजोँनो थांनानै थानो लुबैयो
ब्रजेन्द्र कुमार ब्रह्मआ जेराव खबाम दं बेवहायनो जिउ दं होन्नानै सानो
नाथाय खन्थाइ मोजां मोनै मानसिखौखि सोदोबा गोजोन होनो हायो?
सोदोब मोजां मोनैफोरा खोमाखौ जेसेबां माथुवा
खबाम मोजां मोनैफोरा खबामखौ जेसेबां दबथाया
सोदोबा जेरैबो सोदोब होयो
बार जानानै
दैसानि बोहैनाय जानानै
दाउसिननि मेथाइ
मानसिनि गुरै-खाब्रां रैसुमै गारां जानानै
सोदोबा अखा खोरोमनाय
सोदोबा बांग्रिँ
अरनि सालाइ फिलन्नायनि गिर गिर सोदोब
बायजो आरो गोसोनि सोदोब
मिथिखा नोँनि उखैनायनि गाबख्रावनाय
लाजिनायनि मिनिनाय
सोदोबफोरा एखेबारे दग'-मग'
हौवा गोदाना गावनि खुसिखौ खैनानो बुंनो सान्नाय
दौदिनि मिनिनायनि ओँथि बुजियो सोदोबा
आयलोँ-आग्रां-खाजि रांखिनि
जाराफाग्ला आरो बार राजा बावबुलिनि रागा
सोदोबा जोनोम आरो थैनायनि गोथै हाखर
ब्रजेन्द्र कुमार ब्रह्मनि रावै-
''मिनिथावा बोराबथावा असदा असदा-
नारेँ खमला थायहोयो नारेँ आसि बिफांआव
नारेँ आसि थायहोयो नारेँ कमला बिफांआव''
बेखायनो सोदोबखौ मोजां मोनो आं
खुगा दं होन्नानै। खोमा दं होन्नानै
खन्थाइगिरिनि रावै आरो मा बुंनो?
आदमनि खुगाजोँ जोनोम जायो अनजालि दोरबि
इभनि खुगाजोँ जोनोम जायो अनजालु रजे
मानोना अनजालि!
सोदोब गैयामोनब्ला नोँखौ आं नागिरना मोन्नाय नङामोन
सोदोबफोरा नेहाद आरो नेहाद नङै
सोदोब गैयामोनब्ला
अन्थाया दुद्रुगौमोन ना दुद्रुआमोनथाय......!