कक्राझारनि हिमाबादि खुवा Poem by Ronjoy Brahma

खोमसि खोमसि खुवा सिङाव
जेन'बा आं खुवाखौसो हिमाबादि जोमदों
खुवाखौ जोमनानैनो आं लामाजों थाबायदों
गौरां दैसा सेरनि निहिर सिनाय सुहाबनाय लामा

रानज्रिंलांनाय गौरां दैसाखौ आरो दाहोनसै
खुवाया बोलोगोराबादि बाग्रायनानै लादों
गौरांआ दा गाबदों ना रंजादों सोर मिथिनो?
बिखौ आं जेसेनो थाद'ना अननो ओंखारो आंहाबो जारलायावसो गोग्लैयो

ना, नाथुर, साम' आरो
दैसाखौ गोगोम खालामग्रा एम्बु थेरे
गुसु अन्थाइआव बिसोर दा उन्दुदों ना आदार नागिरदों?
आं जेबो साननोनो हाया

अब्लाबो आं नायहरदोंमोन निसा नांनायबादि
जेन'बा आं मुजिथाव सिगारेड्सो सोबदों
आंनि खुगाजों उखुन्दैया सवा स' गलांदोंमोन
आं सहर फारसे नायहरो। मेगन सौसिनो हायै खुवा

सि आइ टी नि बिल्डींआ जब्रा जानायबादि जादों
बहाबा हाफिसा हौवा दाउआ रोमै रोमै गाबदों
अब्ला आं गोसोखाङो जोंनि दालाइ गोरान फांसे बिफांखौ
खुवा सोरगिदिं कक्राझारखौ गोबाफैदों

आं आंनि देरासिम गिदिं बोफिननाय समसिम
साननि जारौ बाखोनायख' हायै मोखां नायनो
दा बयबो उसु-खुथुजों हांखुर जादोंसै
बिफांनि बिबार, बिलाइ, बिथ' आरो गासै दंनायमानि

जायफोर थांनानै थानो लुबैयो
मिजिं गोनां गोथां जिउ सुजाबनानै लानाय जिब-जिबि
बुहुमा हरबबादिनो थाबाय थानायखौ सोरथो लुबैयो?
बयबो लुबैयो हरनि उनाव सान