गौरांजों बिरलांनाय मासे दाउसिन Poem by Ronjoy Brahma

मा बुंनो मा फोलानो बिरलांबाय मासे दाउसिन
खिबुआव खि लानानै-गौरां दैसाजों।
जोबोद गिख' दाउसिन बियो;
गिख' नङाब्ला माथो?

जानो हागौ; आं सानो

जोबोद खुसि जानानै आं जेबोला
लामानि थरसे अन्थाइ
आंनि मिजौहां जानाय आगदा आखायजों खनखाङो
बेनिफ्राइ आखायखौ माय मिल फिदिंनायबादि सोर सोर फिदिङो

आरो आं फांसे बिफांआव
अन्थाइखौ ज्राव गारहरो;
अन्थाइआबोनि अन्थाइ
बियो बिफांनि दालाइआव थांखाव सौदाव हैबाय।

बागदावबाय सिबाय दाउसिनआ
गां गुब्रुंलायनाय बियो बिरलांबाय गौरां फारसे

आं सानदों-
बि दाउसिना सिरि सिरि थेन्थौनानै दंमोन जानो हागौ;
नङाब्ला मानोथो बागदाव खांखो?
गमामा बियो आंखौ सुथुर सानबाय

सानबाय माने बियो आंखौ सुथुर सानथारबाय;
नाथाय आं सुथुर नङा रावनिबो।

हे दाउसिन! नोंनि सायाव आंहा जेबो गाज्रि नोजोर गैया
जानो नों आंखौ इनाय सानफ्लांबाय;
नों आंखौ इनाय दासान
नों आंखौ साव दाहोथार दे!

नोंखौ खुलुमो आं