आं थैगोन आरो थांखांफिनगोन Poem by Ronjoy Brahma

आगोन दानआव ओंखाम गोदान मोनजानानै
ओंखाम गोजामखौ जानो खहाबा जायो;
नोंनि आरो आंनि गोसोआ मालायखि खम?

बिथांआ आंनि दाफोनायाव बुज्रावफैयो-बुङो
लोगो मादि गुथाल नोंनि आंनि थैनो लुबैनाय
थैनायहा धड़ीनि सुजों खुरमा जाया;
नोंथांआ माब्ला थैनो बिग्रायै बिग्रायै?

बुङो आं-हे लोगो आरोबाव बुंनांलिया

आं थैगोन आरो थांखांफिनगोन
नोंनि थाखाय। थारमाने नों गसंनाय आथुमसे हाखौ
रैखा खालामनो गोबानो जुनै
नों माब्ला थैनो-बे सोंनायआ मानि?

नों आंखौ गिख' दासान दे
जों खालि दावबायनोल' आथिं बोथ्रोदनांगौ;
गुस्थि बिजौआव बिबारनि बेरेमोदै लानानै
बुंथावथाव रावै फाइलि सोमावना रोजाबै रोजाबै

बिमा-बिफा गैजायै बुब्लि-बिदिन्थाखौ लोगो लानांगोन
लुबैनायखौ नागारदो जेसेबां लुबैयो
लुबैनायनि थाखायनोदि बेसेबां बुलाय-सोलाय
जोंनि सिद्लाआ बारहुंखा बारनायबादि जायो दाखोर

सुनामि जायोब्ला हिमालयनि महरआ सोलायो
जोमै लायोब्ला अख्रां आर मिथिंगाआबो सोलायो
सानजानि बै सिमनानिफ्राइ नायहरनाय सानआ
दा लासै लासै दावबायबाय-नंगौ दावबायबाय