आंनि गार्लप्रेण्डआ नोंनिख्रुइ समायनासिन Poem by Ronjoy Brahma

नों एसेबां देलाइमांग्रि
एसेबां देलाइमांग्रिदि
देलायै देलायैनो एखमबा एखमबा
नोंनि मेगननि मुसुगुरानो बारआवसो बिरबायो

एनजर सिखाफोरा बासा बोनानै गोदो गोदो उनदुयो

आंनि गार्लप्रेण्डआ ना गुरो दैसाआव। मैगं खायो बारिआव
फालि दलरआव ओंखाम थफ्ला रुजुननानै
जिनिर गैयै सोमख्रै मिनिस्रांना दुब्लिआव लाबोयो
बेद्लावखौबो गिया लेवारखौबो गिया। गिया जिबौखौबो

आंनि टेसिस (thesis)एबा डिचारटेसन (dissertation)आव
आंनि नोंनि महरनि बागै लिरा
आंनि गार्लप्रेण्डनि बागैसो लिरो
मानोना आंनि गार्लप्रेण्डआ गोरोबनो हायो मिथिंगाजों

नआव फिसिनाय दाउ, अमा, फारौ, हांसो आरो मोसौफोरजों

नाथाय नों मानोबा मुगैसो गारो
मोसौ गोबोर, अमानि आदार आरो बायदि बायदि
खायसो मोनथारो दाउ-हांसो उखुमनि दाउफ्रिफोरखौबो
बेखायनोथ' आंनि गार्लप्रेण्डआ नोंनिख्रुइ समायनासिन

दाखोर सिबो बियो ननि सोरगिदिं
ओंखाम फोमोनो बिखानि हांजों
मिजि मिजि आसिजों आगर एरो
जारौ गोबा गुस्थिजों समायसार होयो मिथिंगाखौ

नों लेखा गोरों जानानैबो
गावनि गुस्थिआव मैला फुनद्लानानै लाबाय
नाथाय आंनि गार्लप्रेण्डआ जोबोद सांग्रां
बियो नंखाय बुङा एसेबो फोलाया-सिखोमायाबो