बे दिङाआ आंनि जब्रा गोरबोखौ बोलाङो Poem by Ronjoy Brahma

सोर्गो होननाय खोनाबा थैफ्रामलायग्रा सुबुंफोरनि बिखायाव
रंनि रं गाबनि गाब रं बेरं; बरं सोमोनांथाव सिमां-हामां
बेबादिखौ नुनानै लामायाव मुगासे मोननाय फाग्लाया मिनियो
मिनियै मिनियै सिरि थायो आरोबाव गोदानै जुरिफिनो

आंनि गोरबोआ जब्रा जाबाय दैबानायाव, खेबसे बैसोमुथिनि गिसिखानायाव
आं सानो-बबानि गुस्थिआ मानो एसेबां गिलिर होनबा?
जेखियानो जाया दिङाआ आंखौ लानानै थांदों गाथोननि उनाव गाथोन
आं खालि गिदों दहमगासे; दहमगासे आंनि खुसियानो लाथ्रहाया

आंनि खन्थाइबादि गां फुवारग्रा मिजिंआ लाथिम दाजोबलांथों
बुब्लि मोनफ्रोम आंनि गोरबोआ सुथि एबा बेहुसआव थाथों
बेखौनो हास्थायो आं। कम्युनिकेसननि बाथ्राखौ खोनासंनानै
मानोना मोदैखौ खेरखेराया दिङाआ दावलांबाय थायो

दलर थानाय आंनि गोरबोनि निजोमथिआ माखननि महर लायोब्ला हामगौ
आंनि गोरबोखौ ओरैनिफ्राइ हरै बोनानै लाङो दिङाआ
आंनि जिउनि ओंथिखौ बुजिनो गोरों बे दिङाआ आंनि सिबिनां
दुखुनि जेख'निफ्राइ बोलांग्रालै बेयो सयथि अराय आंनि

गोसो थोखोमानायखौ गोसोनि एखेबारे लोरबांथि होननानै सानजाया
मोदै मन'नानै गोबाथाबो आं दिङाआव हरखि सान
जिउ बिबाननि रंगिना बिसम्बि सुजुनो लाथिख' सुफुंनानै
आं हास्थायो- जेन आं बिनि बामख'आव गोरलै गथ'बादि उनदुलाङो