आंनि को-इग्जिटेन्सआ एसे मिनियो Poem by Ronjoy Brahma

मेलेमाव रोदोमनाम जायराब बंफांफोराव
दाउसिनफोरा बासा बोयो गुस्थिजों रुंग'लाङो
बेसेबांबा बासा बोयो आरो रुंग'लाङो
मेथाइ रोजाबनायनि उनाव मेथाइ हांमा-दाहा सुखुनि

मैखुननिफ्राइ आमाय थख्ल' दिन्दौनाय निहिरआ
गोरबो गेजेर गेजेर गोथां दुब्रि बागानआव
सियालनि हाबा जानानै मोसायो अखा महरै
आसरिद आं मैया दिनै गाबोननि थाखाय

लोदो लोदो अमा खासिखौ
हाब्रुआव दुगैनाय नुब्ला मुगैसोगारो आं
हाब्रुखौनो गोथारसिन सानो नाथाय अमाया

खनले खनले बारआ सिफुं सुलाङो
सानजानिफ्राइ सोनाब
साहानिफ्राइ खोला दैसाया बोहैबाय थायो
आंनिनो लोगो आंनिनो जिउनि खबाम

आथिखालाव आंखौ आवसाव बुंनो सानो
आवसाव होनबा मा बुंनाय जायो मिथिरोङैफ्रा
आंनि को-इग्जिटेन्सआ सिबाय अनथाव-बाथाव
लुथुर-फुथुर जायख्लंबादि नोगोद समायना

एसे गाबो एसे मिनियो
दैसा रुगुं रुगुं बिबारनि फाइलियाव
जानसि सोमावनानै सम सम
आरो सम सम गुस्थिखौ बोफ्लोमनानै