ओरैनो उरायलांबाय गंसे सोदोब Poem by Ronjoy Brahma

अखाफोरनि मेरु होसोनानै उरायलांनाय गंसे फेलें रकेटबादि
उरायलांबाय गंसे सोदोब ओरैनो बिखा गेजेरनिफ्राइ
जाय सोदोबखौ आलो गोजोन फेदेरदोंमोन आं
नैबे गोसो गोरबो सिङाव

गावनो मोखां दिन्थिहरनाय अखाफोरा दोरोदलांदों
समनि फाखनजों ना फाखनासो समखौ फिदिंखो
बुंनो हालिया आं
बिखौ थि थांखिनानैनो
सोदोबाथ' हाजार जोमै बार उरसिलांदोंमोन

आह' सोदोब- ओंथि बहरा सोदोबमोन बेयो
दा सोदोब बाख्रियावबो बेनि मासि गैलिया
ओंथि गोमानाय नेवसि जानाय सोदोब
बिमा बिफा गैजारोङै सोदोब
बाय-बाहागि गैजारोङै सोदोब

आंनो सोरजिदोंमोन बे सोदोबखौ
बिनि थाखाय हरखाब सानसेखालि
दैज्लांमोन

गंसे हायेन सोरजिनो थांखिमोन बियो
अराय अनज्लायनायनि
खोमसि होखारगौमोन खना खनलानि
सानदोंमोन आरो सिरि सिरिमोन बेसेबांबा
स्रोद अखाफोरनि गोगो सोरां आवथिना लाबोनानै