हरैनिफ्राइ ओरैसिम फिननाय Poem by Ronjoy Brahma

जेरबाआव सारि एबा मेखेला एबा फाथानि फाननानै
नङा नङा ओहो नङा
लाइगां दखनाजों फासोरा
साहा बागानाव आं जेब्ला थाङो आं नुयो नोंनि जुमुर मोसानाय

बैसागि सिखोला औवा बिजौनि देंखोजों
खाम जथा थर्खानि थाल मुद्राजों
हाइला-हुइला मोसागोरा
गामि गिदिं गिदिं आदै मादैमोननिसिद्ला सिद्ला

बैसागि सिखोलाबादि लाइमोन
नों सिखोला मिनिबाला
समायना आरो अन्थाव-बाथाव
साहा बिलाइफोरा आजोलं आजोलं नायहरो

मोनसे दुनिया
मोनसे फुं मोनसे सानजौफु मोनसे बेलासि
हराव गोदो गोदो उनदुलांनायनि सिगां
साहानि जोरलै बिलाइबादि मेगन गेवलां बेखेवना

आं नायनो लुबैयो नोंखौ
मेगननि मुसुगुर थिखोना आं नायो नोंखौ
बेबादि आं जेबोला गामिनिफ्राइ
औवा सुबानि फारसे नायहरना बुङो
आं नोंखौ जोबोद नायनो लुबैयो

अब्ला हरैनिफ्राइ ओरैजाय बुंहरफिनो सोरबा
नायनो लुबैयो नायनो लुबैयो नायनो लुबैयो
लुबैयो............।

बेबादिनो आं जेब्ला बुंनो सानो
आं नोंखौ मोजां मोनो
फिन नों बुंहरफिनगोन ना?
बुंहरफिनगोन ना बुंहरफिना, बुंहरफिनगोन ना बुंहरफिना?