मंगलियान गाबनि दखनाजों मान्दार बिबारि गस्ला
बिनि गुस्थिआबो बेसेबा जारौ जाथारदोंमोन
इस! लामाया मानो एसेबां मेंब्रांब्रांथारमोन होनबा?
बि सिख्लानि आगानाव रोंगो मोनसो गारदोंमोन सिबायफोरा
आं जिबादि बिखौ गोसो थोखोमायोना बुंनांलिया आरो
सिमांआव नुआखिसै आं बि रजेखौ मुगा मोनसेबो
लामानिफ्राइ आरो गोदान लामा गिदिंफिननानैबो
बिखौ गोसोखाङो आं
आंदि बेसेबां मोजां मोनो
अनथाव-बाथाव बियो जेरैबादि फाव खालामदोंमोनदि
जेनबा बियो दुब्लियाव ओंखाम हैनो थांदोंमोन
जेनबा बियो हाब्रु हाब्रु आफा दाउदैखौ गासोमलांदोंमोन
हुरा हुरा बियो माबा-माबि बुंदोंमोन बाथ' दाउसिनबादि
आंनि बिखाया मादि जादोंमोनथाइ आंसो मिथिगौ
दा बोथोरा सारा मुलुगावनो फागुण- सोरगिदिं फागुण
आंनि मेगनाव आंनि गोरबोआव आंनि गासै हांआव
आं उनदुलांहां जायोब्लाबो बिनि मुंआ गोजावबोयो
हरआव सानआव अखाफोर हाथर्खि जानानै मेगन बोद्लाफैयो
दिनै अखाया फाहामदों बैसोमुथिनि गाराय थारमाने जब्रा
थांनायनि थैआव आं मेथाइ रोजाबो सोदोब होनानै
जुथेयै नोंनि थाखाय आं मादि जानो हागौथाइ
आबाद थिलिआव गिदिंबायो आं बिखौ नेनानै
बियो फैयोखोमा खर'आव ओंखाम लानानै
जिनजिरि खाजानाय बादि आंनि थोंनै आथिं
सिलाइजों नाथाख्रियाव थुबथाबजानाय बादि गोरबो
बि सिख्लाया आंखौ गोसो थोआब्ला लासिंसिं जाथारगोन आं
This poem has not been translated into any other language yet.
I would like to translate this poem