बैसोमुथिनि गोबां फिसाफोर Poem by Ronjoy Brahma

हादोरनि थाखाय जुजियै जुजियै थैनो मोननाय
आंनि खाफालआ बेसे गोजों आंसो मिथिगौ
सासे गावथारजानाय सिफाइ आरो बिथांनि बोहैबाय थानाय थैआ बुङो
बैसोमुथिखौ गावनि बामखआव गोबाख्रबै गोबाख्रबै

जेरैबो सोदोब दा दावहानि आरो जेरैबो उखुन्दै
जेननायनि खारनाय खांग्रां-खुग्लुब
गाग्लोबग्रानि होसोनाय
बेफोर गासैखौबो नुनो मोनदों थैनाय फाइखिनि सिलाइ

थैनाय फाइखिनि रानथाबनाय थैआ बुङो
आंनिनो हादोर बेयो

बयनिबो थैआ बयनिबो थाखायनो आंगो
बैसोमुथिआ बेखायनो खुरैआव जमा खालामो बयनिबो थैखौ
थैजों मोनसे गोदान मोजां हादोर सोरजिफिननो जुनै
फिसाफोरखौ आरो मा बुंबावनो सोरबा भद्र सोरबा अभद्र

बैसोमुथिआ बेखायनो एखमबा एखमबा गाबो हाद्रि जानानै
अमा फिसाफोरा बिमानि आबु सेलायनायबादि जेन'
अभद्र फिसाफोरा सेलायदों बिथा मोनसे कम्बल गांसेखौनो
अब्ला बिदा-फंबाय होननाय रावबो गैलिया मुलुगाव

नै दाउथु नों जेसेबांखि अख्रां बिरदावलाङा गांखं फुवारनानै
नोंखौ गावनो दिहुनबाय गोदान आरोबाव गंसे मिसाइल
नै मोस्रोम नोंसोर जेसेबां बिखा फोनां फोनां गोबालायआ मानो
नोंसोरखौ थेरबेथेर खालामनो दिहुनबाय थरसेबाव एटम

लोगो फै नों आंनि खाफालाव गुलि गावनो
आं गावगोन गुलि नोंनि बिखायाव गब्लंलायजासे
अमा फिसाबादि नों आंखौ आयनि आबु जानो एसेबो खाबु होआब्ला
आंबो नोंनि आबु सोबग्रा खुगायावनो अरनानै होगोन