हास्थायो आर'ज गाबो Poem by Ronjoy Brahma

नै दाखालिसो
आबाद दुब्लिखौ दैबानाया बोखानानै लांबाय
गायनाय आरो फुनायनि बेसेन
आरो अखा सिजानाय सानदुं खामजानायनि बेसेन
गैला दैयावनो थांजोबबाय
बुंनांगौ दंमोन माबा मोनसे मोनफिननायनि मिजिंजों
नाथाय थालांजोबबाय बुंनो गोनांआ
बेवहायबो एसेबां दुखु जायाखिसै आं

गुबैयाव आंनि गोमाजानाया बिघासे हा नङा
आबाद बबेखानि आबाद फोथारबो नङा
गुरसे बिखासो
बिनिख्रुइ आंगोसिन माथो दंमोन

बुंनांगौआ बेसो
दाउसिन मासे बासा बोदोंमोन आंनि बिखायाव
बिसोरनि मेथाइ बेसेबांबा रैसुमै बेसे खोनासंनोमोन
हाग्रामा मोनसे रज'दोंमोन आंनि बिखायाव
लैथो लैथोमा
बारि बिबार बागान बेसेबा समायना
गोजोन सुदेम रंजानाय जेबो आंखाल गैयामोन

आंनि बिखायाव गंसे अरगें बेरफ्रुखांबाय
आरो गंसे बालाहामारज'बाय
बेनिखायनो हास्थायो आर'ज गाबो
दैबाना फैथों आंनि खर' साजों बोहैनो