बे समाव गोसोखाङोब्ला Poem by Ronjoy Brahma

दे एसेल' मोदोमाव दां दे
नोंखौ गनथंआवनो थांखाव होगोन आं

नेरखो बिथांआ एसेल' खम नंखायामोन
उदैयाव जोनो होनबाथाय
मेगनखौ गल'होगोन होनखायोमोन
आंबो एसेल' खम नङामोन

आंनि गस्लानि गुदाम नेरखोनि गस्लानि गुदाम
बेसेबांदि जयोमोनथाइ.......!
नाय फात्ता

लारु दरजि
फेन गस्ला सिलानि होग्रायासो मिथिसिगौ
नाथाय लारु दरजिया दा थिखादारसिम कनभार्ड जाबाय
कनभार्ड जाबाय आं- आंनि लोगो नेरखो


थारैनो जों थोबसे बेलुनखौ मोनसे खुगाजों फाला-बदल
फाला-बदल सुलायबोबाय
थारैनो जों नारें जुमब्रानि जोलुर जोलायबाय
खुबैलायबोबाय दावा बिबारजों
सेलथाव गावलायबोबाय मिसथां फिथाइ आरो जारि फिथाइजों

ना बोननाय
खुसेंग्रा जावनाय
गोमब्रि फिथाइ गाफ्रुनाय
दाउब' आथिं गाखोनाय बायदि बायदि

दा नोंहा बैफोर गोमो-गोथां नुहरनाय जायख्लंखौ गोसोआव दंबावो?

गोसोआव थागोन थानायालाइ अब्लाबो
गोसोखांनो समानो मोनलिया माथो
आंहाबो सम मोनलिया

मानोना
मानोना
मानोना आंनि जिउआ बे जेआव सैनानै दोनजाबाय
नोंबो सैनानै दोनजाबाय बेवहायनो

बेमा जेनिफ्राइ बारगनो थाखाय जों सानैबो मुखुब


जे सोंग्रा माख्राया जोबोद बायगर
नोंखौ एग्रांलाय आंखौ एग्रांलाय
नोंखौ एग्रांलाय आंखौ एग्रांलाय
आंखौ आरो नोंखौ एग्रांबाय थायो

बेबादिनो एग्रांबाय थायो


अब्लाबो बियो सम सम थेन्थौनानै थायोब्ला
आं गोसोखाङो आयनि गोरबोनिफ्राइ हानथिबोनाय
आंनि आगान आरो आसिनि देरदोखोन देरबोनाय
सख्ल'-बख्ल' जिउ मोनसेनि गां सुबोनाय बुब्लि

बेखायनोथ' गोसोखाङोब्ला आं बे समाव
दंफांआव गाखोनानै उनदुलांनायबादि मोनो